مقبوضہ کشمیر کے علاقے کلگام میں بھارتی فوج کا آپریشن بری طرح ناکام ہوگیا۔
کشمیر میڈیا سروس کے مطابق 12 روز تک جاری رہنے والے آپریشن میں بھوک پیاسے بھارتی فوجی مٹی کھانے پر مجبور ہوئے،کلگام میں ہونے والا یہ آپریشن بھارتی افواج اورکشمیری مزاحمت کاروں کے درمیان طویل ترین لڑائی ثابت ہوئی جس میں 12 دنوں میں 9 بھارتی فوجی ہلاک ہوئے جبکہ ہیلی کاپٹرز اور ڈرونز بھی ناکارہ ثابت ہوئے، آپریشن میں کرنل سمیت بھارتی فوج کے 14 اہلکار شدید زخمی ہوئے،کلگام میں 12 روزہ آپریشن کے بعد بھارتی فوج کو خالی ہاتھ پسپائی اختیار کرنا پڑی،ایک بھارتی فوجی نے اپنے آخری پیغام میں کہا کہ 5 دن سے کھانے پینے کو کچھ نہیں، فوجی مٹی کھا کر زندہ ہیں۔شمیر نیوز آبزرور نے بھارتی سکیورٹی ذرائع کے حوالے سے بتایاکہ مزاحمت کار آپریشن کے دوران محاصرہ توڑ کر جنگل کی جانب جانے میں کامیاب ہوگئے۔
دوسری جانب حریت کانفرنس کا کہنا ہے کہ کلگام آپریشن بھارتی فوج کی سب سے بڑی حالیہ شرمناک ناکامی ہے، مودی حکومت سیاسی ناکامی چھپانے کے لیے کٹھ پتلی فوجی آپریشن کروا رہی ہے۔
علاوہ ازیں بھارت کے غیرقانونی زیرِقبضہ جموں کشمیر کے ضلع بارہمولہ میں قابض بھارتی فوج کا ایک اہلکار حملے میں ہلاک ہو گیا ہے۔کشمیر میڈیا سروس کے مطابق بھارتی فوجی ضلع بارہمولہ کے علاقے اوڑی میں آپریشن کے دوران ہلاک ہو گیا۔بھارتی سرکاری ذرائع نے فوجی کی ہلاکت کی تصدیق کرتے ہوئے کہا کہ علاقے میں آپریشن تاحال جا رہی ہے۔
غیر قانونی طور پر بھارت کے زیرقبضہ جموں کشمیر کے ضلع ڈوڈہ میں ایک بھارتی فوجی اہلکار پُراسرار طورپر ہلاک ہو گیا ہے۔کشمیر میڈیا سروس کے مطابق بھارتی فوجی حکام نے میڈیا کو بتایا ہے کہ بھارتی ریاست اوڈیشہ کا رہائشی سریش بسوال ضلع کے علاقے بھدرواہ میں واقع بٹالین ہیڈکوارٹر میں حادثاتی طور پر گولی چلنے سے ہلاک ہوا ۔ پولیس نے واقعے کی تحقیقات کا آغاز کر دیا ہے۔واضح رہے کہ مقبوضہ جموں کشمیر میں تعینات بھارتی فوجیوں میں خودکشیوں کا رحجان تیزی سے بڑھ رہا ہے ۔
