بھارتی چینل کا نورخان ایئر بیس پر حملہ ثابت کرنے کیلیے یوکرین کی تصاویر کا سہارا

نئی دہلی سے نشر ہونے والی ایک رپورٹ میں بھارتی نیوز چینل CNN-News18 نے ایک سنگین غلط معلومات پر مبنی دعویٰ کیا ہے، جسے اب بین الاقوامی سطح پر جھوٹا اور گمراہ کن قرار دیا جا رہا ہے۔ چینل نے ایک سیٹلائٹ تصویر پر مبنی خبر میں دعویٰ کیا کہ پاکستان کے نور خان ایئر بیس پر مبینہ فوجی حملہ ہوا ہے، لیکن تحقیقات سے پتا چلا کہ دکھائی گئی تصاویر کا پاکستان سے کوئی تعلق ہی نہیں!

خبر کے دوران چینل نے "Pre-strike” اور "Post-strike” کے لیبلز کے ساتھ سیٹلائٹ تصاویر نشر کیں، اور یہ دعویٰ کیا کہ یہ نور خان ایئر بیس، پاکستان کی ہیں۔ مگر غیر جانبدار ماہرین کی جانب سے کی گئی جانچ سے یہ بات سامنے آئی کہ اصل میں یہ تصاویر یوکرین کے بیلا تسیرکوا (Bila Tserkva) نامی فضائی اڈے کی ہیں، جو روس-یوکرین جنگ کے دوران خبروں میں رہا ہے۔یہ واقعہ اس رجحان کا تسلسل ہے جسے بھارتی سوشل میڈیا پر "گودی میڈیا” کہا جاتا ہے ، ایسے میڈیا ادارے جو حکومت کے بیانیے کو تقویت دینے کے لیے جھوٹ اور فریب سے کام لیتے ہیں۔ CNN-News18 جیسے ادارے اکثر "ایکسکلوزو” کے نام پر ایسی خبریں نشر کرتے ہیں جو بعد میں بے بنیاد یا مکمل طور پر غلط ثابت ہوتی ہیں۔

تجزیہ نگاروں کے مطابق اس قسم کی خبروں کا مقصد صرف اور صرف اپنے ناظرین کو پاکستان مخالف جذبات سے بھر دینا اور سیاسی مقاصد کے لیے رائے عامہ کو گمراہ کرنا ہے۔ اس واقعے سے ایک بار پھر یہ ثابت ہو گیا کہ بھارتی میڈیا کا ایک بڑا حصہ حقائق کی بجائے پروپیگنڈہ پر یقین رکھتا ہے۔ سوال یہ ہے کیا ایسے میڈیا اداروں کو جھوٹ پھیلانے پر جوابدہ ٹھہرایا جائے گا؟