بھارتی الیکشن کمیشن نے 334 رجسٹرڈ سیاسی جماعتوں کی رجسٹریشن منسوخ کر دی

لاہور(خالدمحمودخالد) بھارتی الیکشن کمیشن نے سیاسی جماعتوں کے خلاف بڑی کارروائی کرتے ہوئے ملک بھر میں 334 رجسٹرڈ غیر تسلیم شدہ سیاسی جماعتوں کی رجسٹریشن منسوخ کر دی ہے۔ الیکشن کمیشن کے اس اقدام کے بعد جن سیاسی جماعتوں کی شناخت منسوخ ہو گئی ہے وہ ملک بھر میں اپنے انتخابی نشان کے ساتھ الیکشن نہیں لڑ سکیں گی۔ الیکشن کمیشن آف انڈیا کی طرف سے جاری کردہ معلومات کے مطابق عوامی نمائندگی ایکٹ 1951 کی دفعہ 29B اور سیکشن 29C کے ساتھ ساتھ انکم ٹیکس ایکٹ 1961 اور انتخابی نشان ریزرویشن اینڈ الاٹمنٹ آرڈر 1968 کی متعلقہ دفعات کے تحت ان سیاسی جماعتوں پر پابندی لگائی گئی ہے۔ تاہم اس حکم کے خلاف 30 دن کے اندر الیکشن کمیشن میں اپیل کی جا سکتی ہے۔ اس وقت بھارت میں 6 قومی پارٹیاں، 67 ریاستی پارٹیاں اور 2854 رجسٹرڈ غیر تسلیم شدہ سیاسی جماعتیں الیکشن کمیشن آف انڈیا کے ساتھ رجسٹرڈ ہیں۔ قوانین کے مطابق اگر کوئی جماعت مسلسل 6 سال تک الیکشن نہیں لڑتی تو اس کو رجسٹرڈ پارٹیوں کی فہرست سے نکال دیا جاتا ہے۔ کمیشن کی اس کارروائی کے بعد اب کل 2854 جماعتوں میں سے 2520 باقی رہ گئی ہیں۔