ممتاز حیدر
پاکستانی ذرائع کے مطابق، بھارت نے اپنے مذموم عزائم کو پورا کرنے کے لیے رات کی تاریکی میں پاکستان پر حملہ کیا ہے۔ بھارتی فوج نے یہ حملہ اس وقت کیا جب شہریوں کی زندگی معمول کے مطابق گزر رہی تھی، اور اس حملے میں نہ صرف معصوم شہریوں کو نشانہ بنایا گیا بلکہ مذہبی مقامات کو بھی برباد کر دیا گیا۔
ذرائع کے مطابق، بھارتی فوج کے شرمناک حملوں میں ایک اہم مسجد، مسجد سبحان بہاولپور، بھی نشانہ بن گئی۔ یہ مسجد جو کہ ایک مقدس مقام ہے، بھارتی حملے کی زد میں آ کر مکمل طور پر شہید ہو گئی۔ حملے کی شدت سے مسجد میں موجود قرآن پاک سمیت دیگر اسلامی کتابوں کو بھی شدید نقصان پہنچا۔یہ بات قابلِ ذکر ہے کہ جنگی حالات میں بھی دنیا بھر میں مذہبی مقامات اور نہتے شہریوں پر حملے نہیں کیے جاتے، مگر بھارت نے ایک مرتبہ پھر اپنے مکروہ عزائم کو ظاہر کیا ہے۔پاکستانی ذرائع کا کہنا ہے کہ بھارت نے مسجد کو شہید کر کے اپنے بزدلانہ اور بلااشتعال حملوں کی حقیقت بے نقاب کر دی ہے۔ یہ حملہ صرف پاکستان کی فوج پر نہیں، بلکہ مسلمانوں کے مذہبی جذبات اور مقدس مقامات پر حملہ تھا، جو عالمی قوانین اور انسانیت کے خلاف ہے۔
پاکستان نے اس بزدلانہ حملے کی شدید مذمت کی ہے اور عالمی برادری سے مطالبہ کیا ہے کہ بھارت کے اس غاصبانہ اقدام کا نوٹس لیا جائے اور بھارت کو عالمی سطح پر جوابدہ ٹھہرایا جائے۔
