بھارتی پنجاب اب آپ کا۔ کانگریس، بی جے پی کو بدترین شکست

بھارتی پنجاب میں حکمران جماعت کانگریس کی عبرت ناک شکست کے بعد بھارتی تجزیہ کاروں نے اس کی ذمہ داری نوجوت سنگھ سدھو کی عمران خان سے دوستی پر ڈال دی ہےاور کہا کہ نوجوت سنگھ سدھو نے عمران خان کے اشاروں پر بھارتی پنجاب کی حکومت میں پھوٹ ڈالی جس سے کانگریس کی مقبولیت کا گراف نیچے آگیا۔

ایک بھارتی میڈیا کی رپورٹ کے مطابق کرکٹر نوجوت سنگھ سدھو جو کہ پاکستان کے وزیراعظم عمران خان کے انتہائی قریبی دوست ہیں، خودکیپٹن امریندر سنگھ کو ہٹا کر پنجاب کے وزیراعلی بننا چاہتے تھے اور عمران خان ان کو سپورٹ کررہے تھے۔

اس وقت کے وزیراعلی کیپٹن امریندر سنگھ ان کو ایک آنکھ نہیں بھاتے تھے۔ کیپٹن امریندر سنگھ کا خیال تھا کہ کرتار پور راہداری بنانے کے حوالے سے سدھو نے ان کو اعتماد نہیں لیا جس سے بھارتی پنجاب کانگریس کی مقبولیت میں بے حد کمی آئی۔

یہ بھی کہا گیا کہ بھارتی عوام نوجوت سنگھ سدھو کے اس اقدام سے خوش نہیں تھےجس سے کانگریس کے خلاف عوامی نفرت کا آغاز ہوا اور کانگریس کی مقبولیت کا گراف تیزی سے نیچے آگیا۔

میڈیا رپورٹ میں یہ بھی کہا گیا کہ کانگریس کی مقبولیت میں کمی کے لئے جہاں کئی عوامل کارفرما تھے اس کے ساتھ ساتھ پنجاب کی سیاست میں عمل دخل کے لئے سدھو کی عمران خان سے مشاورت نے جلتی پر تیل کا کام کیا جس کے نتیجہ میں گزشتہ روز انتخابات میں کے نتائج میں کانگریس کو صرف 15سیٹوں پراور مودی کی بی جے پی کو صرف 5 سیٹون پر کامیابی ملی۔ جب کہ عام آدمی پارٹی نے 85 سے زائد سیٹوں پر کامیابی حاصل کر لی اور اس بات کا قوی امکان ہے کہ 2024 کے انتخابات میں بھی عام آدمی پارٹی دہلی اور پنجاب کے بعد مرکز میں مودی سرکار کے لئے بھی سب سے بڑے خطرہ کا باعث بن سکتی ہے۔