راولپنڈی (باغی ٹی وی، نامہ نگار شوکت علی ملک) ڈویژنل انتظامیہ و امن کمیٹی راولپنڈی ڈویژن کے زیراہتمام محرم الحرام کے سلسلے میں ایک اہم "اتحاد بین المسلمین کانفرنس” کا انعقاد کیا گیا۔ یہ کانفرنس ایک نجی مارکی میں منعقد ہوئی، جس میں کمشنر راولپنڈی انجینئر عامر خٹک، آر پی او راولپنڈی بابر سرفراز الپا، ڈی پی او چکوال لیفٹیننٹ (ر) احمد محی الدین سمیت راولپنڈی ڈویژن کے ضلعی افسران، علمائے کرام اور مختلف مکاتب فکر کے نمائندوں نے بھرپور شرکت کی۔
کانفرنس کا مقصد محرم الحرام کے دوران امن و امان کی فضا کو برقرار رکھنا، اتحاد بین المسلمین کو فروغ دینا، اور مذہبی ہم آہنگی کو یقینی بنانا تھا۔ مقررین نے اپنے خطاب میں کہا کہ معاشرتی استحکام اور مذہبی رواداری کے لیے تمام طبقات کو مل کر کردار ادا کرنا ہوگا۔ شرکاء نے اس بات پر زور دیا کہ جلوسوں کے روٹس پر فول پروف سیکیورٹی فراہم کی جائے اور کسی بھی قسم کی شرانگیزی یا مذہبی منافرت کو سختی سے روکا جائے۔
کانفرنس کے اختتام پر اس عزم کا اعادہ کیا گیا کہ راولپنڈی ڈویژن میں محرم الحرام کے دوران مکمل ہم آہنگی، امن اور بھائی چارے کی فضا قائم رکھی جائے گی، اور کسی بھی ناخوشگوار واقعے کی روک تھام کے لیے ہر ممکن اقدامات کیے جائیں گے۔
