سیالکوٹ (باغی ٹی وی ،سٹی رپورٹرمدثررتوکی رپورٹ) شاعر مشرق اور مفکر پاکستان علامہ ڈاکٹر محمد اقبال کے 147ویں یوم پیدائش کی مناسبت سے "اقبال منزل” میں ایک مرکزی تقریب کا انعقاد کیا گیا۔
اس موقع پر ڈپٹی کمشنر محمد ذوالقرنین لنگڑیال نے تقریب میں شرکت کی، کیک کاٹا اور سکول کے بچوں نے کلام اقبال پیش کیا۔ تقریب میں ملکی سلامتی اور استحکام کے لیے خصوصی دعا بھی کی گئی۔
تقریب میں اسسٹنٹ کمشنر انعم بابر، سی او میونسپل کارپوریشن ملک افضل، سی ای او ایجوکیشن مجاہد علوی، ڈی سی او ایلیمنٹری ایجوکیشن اسماء ڈار، صدر بزم اقبال شمیم خان لودھی اور دیگر نمایاں شخصیات بھی موجود تھیں۔
ڈپٹی کمشنر محمد ذوالقرنین لنگڑیال نے اس موقع پر کہا کہ وطن عزیز علامہ اقبال کے خواب کی تعبیر ہے، جو اپنی تصانیف "بانگِ جبرئیل” اور "بانگِ درا” کے ذریعے ہر دور کے نوجوانوں کو خودی کا پیغام دیتے ہیں، انہیں ناکامیوں کے خوف سے نجات اور رزق حلال کی ترغیب دیتے ہیں۔
تقریب کے اختتام پر ڈپٹی کمشنر نے علامہ اقبال کے والدین کی قبروں پر پھولوں کی چادریں چڑھائیں اور ان کے درجات کی بلندی کے لیے دعا کی۔
