ایران اور اسرائیل کے درمیان جاری کشیدگی میں ایک نیا محاذ کھل گیا ہے۔ ایرانی سائبر ماہرین نے اسرائیل پر سائبر حملہ کرتے ہوئے موبائل فونز کو نشانہ بنایا، جس کے نتیجے میں شہریوں کو خوف و ہراس پھیلانے والے پیغامات موصول ہوئے۔
اسرائیلی میڈیا کے مطابق ایرانی سائبر حملے میں ہزاروں شہریوں کو ان کے موبائل فون پر پناہ گاہوں میں جانے اور ایندھن ذخیرہ کرنے کی ہدایات پر مبنی پیغامات موصول ہوئے۔ ان پیغامات کے ذریعے شہریوں میں خوف پھیلانے اور افراتفری پیدا کرنے کی کوشش کی گئی۔اسرائیلی حکام نے فوری ردعمل میں شہریوں کو متنبہ کیا کہ یہ ایران کی جانب سے سائبر حملہ ہے اور عوام ایسے پیغامات کو سنجیدہ نہ لیں۔ حکام کا کہنا ہے کہ سائبر سیکیورٹی ایجنسیز اس حملے کی مکمل تحقیقات کر رہی ہیں اور سسٹمز کو محفوظ بنانے کے لیے اقدامات جاری ہیں۔
مزید برآں، اسرائیلی ذرائع ابلاغ کے مطابق ایک معروف اسرائیلی ٹی وی چینل کا لائیو پروگرام بھی ایرانی ہیکرز کے نشانے پر آ گیا۔ پروگرام کے دوران اچانک اسکرین پر غیر متعلقہ مناظر اور پیغامات دکھائی دیے، جس پر میزبان اور ناظرین حیران رہ گئے۔
