ایران کے سرحدی صوبے سیستان کے علاقے مہرستان میں 12 اپریل کو مسلح افراد کی طرف سے پاکستانی شہریوں کو قتل کیے جانے کے واقعے کے بعد ان 8 پاکستانیوں کی میتیں پاکستان پہنچا دی گئیں۔ یہ افراد ایک ورکشاپ میں کام کرتے تھے جہاں ان پر حملہ کیا گیا۔
ایران کے صوبے سیستان کی مہرستان علاقے میں 12 اپریل کو مسلح حملہ آوروں نے ایک ورکشاپ میں موجود پاکستانی شہریوں پر حملہ کر دیا۔ اس حملے میں 8 پاکستانی شہری جاں بحق ہوگئے۔ ان میں سے 7 کا تعلق بہاولپور کے علاقے خانقاہ شریف سے تھا، جب کہ ایک پاکستانی شہری کا تعلق ملتان کے علاقے شجاع آباد سے تھا۔قتل کیے جانے والے ان 8 پاکستانیوں کی میتیں رات گئے خصوصی طیارے کے ذریعے ایران سے اسلام آباد اور پھر بہاولپور پہنچائی گئیں۔ اس کے بعد ایمبولینسز کے ذریعے ان کی میتیں ان کے آبائی علاقوں کی طرف روانہ کی گئیں، جہاں ان کی تدفین کی جائے گی۔پاکستانی سفیر نے بتایا تھا کہ جاں بحق ہونے والے افراد میں محمد عامر، محمد دلشاد، محمد ناصر، ملک جمشید، محمد دانش، محمد نعیم، غلام جعفر اور محمد خالد شامل ہیں۔ ان افراد کی شناخت کی تصدیق کر دی گئی ہے اور ان کے اہل خانہ کو اطلاع دے دی گئی ہے۔
وزیر اعظم پاکستان شہباز شریف نے اس افسوسناک واقعہ پر گہرے دکھ اور تشویش کا اظہار کیا ہے۔ انہوں نے ایرانی حکومت سے مطالبہ کیا کہ اس قتل میں ملوث افراد کو فوری طور پر گرفتار کر کے سزا دی جائے۔ وزیراعظم نے کہا کہ یہ واقعہ نہ صرف پاکستانیوں کے لیے ایک سانحہ ہے بلکہ یہ انسانی حقوق کی سنگین خلاف ورزی بھی ہے۔
ایرانی وزارت خارجہ کے ترجمان اسماعیل بقائی نے اس دہشت گرد حملے کی شدید مذمت کی ہے۔ انہوں نے اسے ایک مجرمانہ اقدام اور اسلامی تعلیمات، قانون اور انسانی اقدار کے خلاف قرار دیا۔ ترجمان نے مزید کہا کہ ایران اس جرم کے مرتکب افراد کی شناخت اور انہیں انصاف کے کٹہرے میں لانے کے لیے کوئی کسر نہیں چھوڑے گا۔
