اسحاق ڈار کی پیٹریشیا سکاٹ لینڈ سے ملاقات، دو طرفہ تعلقات پر گفتگو

نائب وزیراعظم و وزیرخارجہ اسحاق ڈار کی ملاقات دولت مشترکہ کی سیکرٹری جنرل پیٹریشیا سکاٹ لینڈ سے ہوئی، جس میں دو طرفہ تعلقات اور تعاون کے مختلف پہلوؤں پر تفصیلی تبادلہ خیال کیا گیا۔ ملاقات کے دوران اسحاق ڈار نے بتایا کہ وزیراعظم پاکستان آئندہ چند ہفتوں میں برطانیہ کا دورہ کریں گے، اور ان کے اپنے دورے کا مقصد پاک برطانیہ باہمی تعلقات کو مزید فروغ دینا تھا۔اسحاق ڈار نے مزید کہا کہ برطانوی پارلیمنٹ میں حال ہی میں منتخب ہونے والے 15 پاکستانی نژاد اراکین دونوں ممالک کے درمیان سفارتی تعلقات کو مزید مستحکم کرنے میں اہم کردار ادا کر رہے ہیں۔ انہوں نے ان اراکین کو دونوں ممالک کے سفیر قرار دیا۔
پیٹریشیا سکاٹ لینڈ نے ملاقات کے دوران کہا کہ پاکستان کا دورہ ان کے لیے انتہائی دلچسپ اور شاندار تجربہ تھا۔ انہوں نے مزید کہا کہ پاکستان نئی دولت مشترکہ کے بانی ارکان میں سے ایک ہے اور اس کی حیثیت دولت مشترکہ کے اندر انتہائی اہم ہے۔پیٹریشیا سکاٹ لینڈ نے پاکستان سے ملی خوبصورت پینٹنگ کا ذکر کرتے ہوئے بتایا کہ یہ پینٹنگ اب مالبرا ہاؤس کا حصہ رہے گی۔ انہوں نے کہا کہ لوگ جب اس پینٹنگ کو دیکھیں گے تو انہیں پاکستان کی خوبصورتی اور ثقافت کا احساس ہوگا۔انہوں نے اس بات کا بھی انکشاف کیا کہ سال 1999 سے ان کی پاکستان کا دورہ کرنے کی خواہش تھی، اور انہوں نے وعدہ کیا کہ وہ جلد ہی دوبارہ پاکستان کا دورہ کریں گی۔ملاقات کے آغاز میں، پیٹریشیا سکاٹ لینڈ نے پاکستانی لباس زیب تن کر کے نائب وزیراعظم و وزیر خارجہ اسحاق ڈار کا استقبال کیا، جسے دونوں ممالک کے درمیان مضبوط تعلقات کی علامت کے طور پر سراہا گیا۔