وکلا کے ممکنہ احتجاج کے پیش نظر سپریم کورٹ کے باہر سکیورٹی سخت کر دی گئی ہے جبکہ جڑواں شہروں اسلام آباد اور راولپنڈی میں چلنے والی میٹرو بس سروس بھی محدود کر دی گئی ہے۔
سپریم کورٹ کے احاطے میں احتجاج کے خدشے کے پیش نظر پولیس کی بھاری نفری تعینات کر دی گئی ہے اور عدلیہ کے مرکزی دروازے تک رسائی محدود کر دی گئی ہے۔ سپریم کورٹ آنے والے افراد کے لیے صرف مارگلہ روڈ کھلا رکھا گیا ہے، جبکہ ریڈ زون کے داخلی راستے بند کیے جانے کے باعث کشمیر چوک میں شدید ٹریفک جام کی صورتحال پیدا ہو گئی ہے۔سپریم کورٹ کے ارد گرد اہم چوکوں، جیسے کہ سرینا چوک، نادرا چوک، میریٹ چوک، ایکسپریس چوک اور ٹی کراس بری امام کے راستے بھی بند ہیں۔ اس کے علاوہ جناح انڈر پاس کو بھی کنٹینرز رکھ کر بند کر دیا گیا ہے، جس سے راولپنڈی اور اسلام آباد کی اہم شاہراہوں پر ٹریفک کی روانی متاثر ہو رہی ہے۔
اس کے علاوہ، میٹرو بس سروس بھی سکیورٹی وجوہات کے پیش نظر محدود کر دی گئی ہے۔ فیض احمد فیض اسٹیشن سے پاک سیکرٹریٹ تک میٹرو بس سروس بند کر دی گئی ہے۔ میٹرو انتظامیہ کا کہنا ہے کہ راولپنڈی کے صدر اسٹیشن سے فیض احمد فیض اسٹیشن تک بس سروس معمول کے مطابق جاری رہے گی، تاہم اسلام آباد میں میٹرو بس سروس سکیورٹی کے پیش نظر بند کر دی گئی ہے۔
شہریوں کو مشورہ دیا گیا ہے کہ وہ متبادل راستوں کا استعمال کریں اور سکیورٹی کے موجودہ حالات کو مدنظر رکھتے ہوئے سفر کرنے میں احتیاط برتیں۔
