گوجرہ: فلسطینیوں پر اسرائیلی ظلم کے خلاف جماعت اسلامی خواتین کی احتجاجی ریلی
گوجرہ (باغی ٹی وی،نامہ نگار عبد الرحمن جٹ) فلسطینیوں پر اسرائیلی ظلم کے خلاف جماعت اسلامی خواتین کی احتجاجی ریلی
تفصیل کے مطابق نہتے فلسطینیوں پر جاری اسرائیلی ظلم و بربریت پر مسلم امہ کی خاموشی اور بے حسی کو شرمناک فعل قرار دیتے ہوئے جماعت اسلامی حلقہ خواتین گوجرہ کے زیر اہتمام مسجد شہداء جھنگ روڈ سے ایک احتجاجی ریلی نکالی گئی۔ ریلی سے خطاب کرتے ہوئے جماعت اسلامی کے رہنما ڈاکٹر عطاء اللہ حمید، حافظ فرحان اللہ ضلعی امیر، مولانا رحمت اللہ ارشد، ضلعی نائب امیر، حیدر علی چوہدری، قاری محمد آصف اور حافظ واجد نے کہا کہ بے گناہ فلسطینیوں کا خون بہایا جا رہا ہے اور عالم اسلام کو متحد ہو کر اسرائیلی جارحیت کا منہ توڑ جواب دینا چاہئے۔
مقررین نے غزہ مارچ سے خطاب کرتے ہوئے کہا کہ اہل فلسطین صیہونی جرائم کا شکار ہیں۔ حماس کے سربراہ اسماعیل ہانیہ اور حزب اللہ کے سربراہ حسن نصراللہ سمیت ہزاروں فلسطینی شہید ہو چکے ہیں جبکہ ہزاروں لاپتہ ہیں۔ ان حالات میں فلسطینی عوام کی مدد اور اسرائیلی ظلم و بربریت کو روکنے کے لیے عالم اسلام کو مؤثر کردار ادا کرنے کی ضرورت ہے۔
مقررین نے حکومت پاکستان سے مطالبہ کیا کہ سرکاری سطح پر اسرائیلی مصنوعات پر پابندی عائد کی جائے اور فلسطینیوں کی امداد کے لیے سرکاری سطح پر فوری اقدامات کیے جائیں۔ غزہ مارچ میں خواتین کی بڑی تعداد نے شرکت کی، جنہوں نے احتجاجی بینرز اور پلے کارڈز اٹھا رکھے تھے، اور فلسطینی عوام سے اظہار یکجہتی کیا۔
