کراچی: معروف فلم پروڈیوسر، رائٹر اور ڈائریکٹر جمشید محمود عرف جامی نے ہتک عزت کے الزام میں دی گئی سزا کے خلاف سندھ ہائیکورٹ میں اپیل دائر کر دی ہے۔
تفصیلات کے مطابق، جمشید محمود نے ہتک عزت کیس میں دی گئی سزا کو غیر منصفانہ قرار دیتے ہوئے موقف اپنایا ہے کہ جس جرم میں سزا سنائی گئی ہے وہ قابل ضمانت ہے اور سزا میں قانونی تقاضے پورے نہیں کیے گئے۔ اپیل میں یہ بھی کہا گیا ہے کہ الزامات غلط اور بے بنیاد ہیں، اس لیے ماتحت عدالت کی جانب سے سنائی گئی سزا کو کالعدم قرار دیا جائے۔
واضح رہے کہ فلمساز جمشید محمود عرف جامی کے خلاف فلم اور میوزک ڈائریکٹر سہیل جاوید نے ڈائریکٹ کمپلین دائر کی تھی۔ اس کیس کی سماعت کے دوران ایڈیشنل ڈسٹرکٹ اینڈ سیشن جج جنوبی نے جمشید محمود کو 2 سال قید اور 10 ہزار روپے جرمانے کی سزا سنائی تھی۔عدالت نے اپنے تحریری فیصلے میں کہا تھا کہ ملزم نے شکایت کنندہ کے خلاف سماجی رابطوں کی ویب سائٹ پر غیر محتاط رویہ اپنایا اور توہین آمیز مواد شائع کیا، نیز ملزم نے اس مواد کی تردید کرنے اور خود کو علیحدہ رکھنے میں بھی ناکامی کا مظاہرہ کیا۔
