جمرود (باغی ٹی وی رپورٹ) انجمن تاجران سخی پل بازار کی نو منتخب کابینہ نے اپنے عہدوں کا حلف اٹھا لیا۔ تقریب میں صدر حکمت آفریدی، جنرل سیکرٹری سبیل آفریدی، ارباب آفریدی، سید میر، شکور، محمد ندیم سمیت دیگر عہدیداران نے عہدوں کا حلف لیا۔
حلف برداری کی تقریب سخی پل بازار میں منعقد ہوئی، جہاں مہمان خصوصی سابق رکن صوبائی اسمبلی اور پارلیمانی لیڈر الحاج بلاول آفریدی نے نو منتخب کابینہ سے حلف لیا۔ تقریب میں اسسٹنٹ کمشنر جمرود ڈاکٹر عامر زیب، ایڈیشنل اسسٹنٹ کمشنر نصیر عباس خلیل، تحصیل چیئرمین حاجی عظمت خان، قومی مشران ملک فیض اللہ جان، اور انجمن تاجران جمرود کے صدر کاشف اقبال آفریدی سمیت بڑی تعداد میں لوگوں نے شرکت کی۔
تقریب کے دوران مقررین نے سخی پل بازار کو درپیش مسائل پر روشنی ڈالی، جن میں نکاسی آب کا ناقص نظام، مارکیٹ مالکان کی جانب سے تاجروں کو پیش آنے والی مشکلات، سخی پل کے نزدیک ناصر باغ روڈ کی خستہ حالی، اور بازار میں بڑھتے ہوئے ٹریفک مسائل شامل تھے۔
مہمان خصوصی الحاج بلاول آفریدی اور انتظامی افسران نے نو منتخب کابینہ کو مبارکباد دیتے ہوئے یقین دہانی کرائی کہ بازار کے مسائل حل کرنے کے لیے جلد عملی اقدامات کیے جائیں گے۔ انہوں نے کہا کہ انتظامیہ موجودہ کابینہ کے ساتھ مکمل تعاون کرے گی تاکہ تاجروں کے مسائل جلد از جلد حل کیے جا سکیں۔
تقریب میں عوام کی بھرپور شرکت نے اسے کامیاب اور پرجوش بنایا، جبکہ نو منتخب کابینہ نے بازار کی ترقی اور مسائل کے حل کے لیے بھرپور عزم کا اظہار کیا۔
