امریکی وزیر خارجہ مارکو روبیو نے کہا ہے کہ یہ فیصلہ کہ روسی صدر ولادی میر پیوتن امن کے قیام کے لیے سنجیدہ ہیں یا نہیں، اگلے چند دنوں میں واضح ہوگا۔
امریکی میڈیا کے ساتھ گفتگو کرتے ہوئے انہوں نے مزید کہا کہ فی الحال یوکرین کی جنگ کے خاتمے کے لیے کوئی واضح طریقہ کار موجود نہیں ہے، تاہم آئندہ بات چیت میں اس معاملے پر فیصلہ کیا جائے گا کہ آگے کا راستہ کیا ہوگا۔مارکو روبیو نے یہ بھی کہا کہ روس اور امریکہ کے درمیان اس بات چیت کا عمل سعودی عرب میں ہوگا،
کریملن نے بھی تصدیق کی ہے کہ دونوں ممالک سعودی عرب میں جنگ کے بجائے امن کے قیام کے حوالے سے بات چیت کریں گے۔ امریکی میڈیا کے مطابق، سعودی عرب میں ہونے والی اس بات چیت میں یوکرین جنگ کے خاتمے کے امکانات پر تبادلہ خیال کیا جائے گا۔امریکی وزیر خارجہ نے مزید کہا کہ انہیں اس وقت یہ معلوم نہیں ہے کہ روسی حکام کی جانب سے اس بات چیت میں کون کون شریک ہوگا، لیکن امریکی قومی سلامتی کے مشیر مائیک والٹز اور مشرق وسطیٰ کے لیے امریکی نمائندے اسٹیو وٹکوف بھی سعودی عرب پہنچنے والے ہیں، جو اس بات چیت کا حصہ ہوں گے۔
اس موقع پر عالمی برادری کی نظریں سعودی عرب میں ہونے والی اس اہم ملاقات پر مرکوز ہیں، جو یوکرین کی جنگ کے خاتمے اور خطے میں امن کے قیام کے لیے ایک اہم قدم ثابت ہو سکتی ہے۔
