پنجاب اسمبلی کے اسپیکر، ملک محمد احمد خان نے کہا ہے کہ بھارت کی جانب سے دراندازی کے باعث پاکستان میں ٹرینوں پر حملے ہو رہے ہیں، لیکن ہم کسی بھی قسم کے خوف کا شکار نہیں ہوں گے۔
انھوں نے یہ بات قصور کے علاقے کھڈیاں میں وزیر مملکت برائے فوڈ سکیورٹی ملک رشید کے اعزاز میں ہونے والے عوامی افطار ڈنر اور جلسے سے خطاب کرتے ہوئے کہی۔اس موقع پر اپنے خطاب میں اسپیکر پنجاب اسمبلی ملک محمد احمد خان نے کہا کہ پاکستان میں ایک مرتبہ پھر دہشت گردوں کی یلغار ہے۔ بلوچستان میں بھارتی دراندازی کی وجہ سے وہاں آگ لگائی جا رہی ہے، اور راستے سے بھٹکے ہوئے لوگ پاک فوج پر حملہ آور ہو رہے ہیں۔ ملک محمد احمد خان نے مزید کہا کہ دہشت گرد ٹرینوں کو روک کر دہشت گردی کر رہے ہیں، انھوں نے اس عزم کا اظہار کیا کہ دہشت گردوں کی جانب سے پاکستان پر حملے کے باوجود ہم ڈریں گے نہیں۔ ہم نے پہلے بھی دہشت گردی کے خلاف کامیاب آپریشن کیے ہیں جیسے ردالفساد، اور ہم اپنے وزیراعظم اور سپہ سالار پر مکمل یقین رکھتے ہیں کہ ہم اس جنگ میں کامیاب ہوں گے اور خوارج کا مکمل خاتمہ کریں گے۔
اسپیکر پنجاب اسمبلی نے مزید کہا کہ پی ٹی آئی اور بزدار حکومت نے ملک کے وسائل کی لوٹ مار کی، اور ان کی حکومت نے ملک میں انتشار اور افراتفری پھیلائی۔ اب بھارتی دراندازی کے ذریعے اس آگ کو دوبارہ بھڑکایا جا رہا ہے۔
دوسری جانب وزیر مملکت برائے فوڈ سکیورٹی ملک رشید نے اس موقع پر کہا کہ وہ اپنی ذمہ داری کو احسن طریقے سے نبھائیں گے اور اس بات کو یقینی بنائیں گے کہ ملک کی ترقی میں اپنا بھرپور حصہ ڈالیں۔
وزیر مملکت برائے توانائی عبد الرحمن کانجو نے بھی خطاب کیا اور کہا کہ ہمیں فخر ہے کہ ہم اپنے بچوں کو بتا سکیں گے کہ ہم نے ملک کی تعمیر و ترقی میں اپنا حصہ ڈالا۔اس موقع پر مختلف سیاسی و سماجی شخصیات کی بڑی تعداد بھی موجود تھی، اور عوامی افطار ڈنر کے دوران پاکستان کے موجودہ حالات اور ملکی ترقی پر کھل کر بات کی گئی۔
