جاسوسی کے الزام میں جیسلمیر کا رہائشی گرفتار، پاکستان کی آئی ایس آئی سے روابط کا انکشاف
پہلگام ڈرامے کے بعد بھارت میں مسلمانوں کے خلاف مودی سرکار کاروائیاں کر رہی ہے ابھی تازہ کاروائی میں پٹھان خان کو بھارت نے پاکستان کے لئے جاسوسی کے الزام میں گرفتار کر لیا ہے
راجستھان انٹیلیجنس نے ایک اہم کارروائی کرتے ہوئے جیسلمیر کے رہائشی پٹھان خان کو گرفتار کر لیا ہے۔ حکام کے مطابق پٹھان خان پر پاکستان کی انٹر سروسز انٹیلیجنس (آئی ایس آئی) کے لیے جاسوسی کرنے کا الزام ہے۔ اس سلسلے میں اس کے خلاف آفیشل سیکریٹس ایکٹ 1923 کے تحت مقدمہ درج کر لیا گیا ہے۔سرکاری اعلامیے کے مطابق، پٹھان خان سال 2013 میں پاکستان گیا تھا جہاں اس کے روابط آئی ایس آئی کے افسران سے قائم ہوئے۔ بتایا گیا ہے کہ وہاں اسے پیسوں کا لالچ دے کر جاسوسی کے لیے تیار کیا گیا اور باقاعدہ تربیت بھی فراہم کی گئی۔ اس کے بعد بھی وہ پاکستان آتا جاتا رہا اور جیسلمیر انٹرنیشنل بارڈر سے متعلق حساس معلومات پاکستانی ایجنسی کو فراہم کرتا رہا۔
دوسری جانب پہلگام حملے کے بعد بھارت اور پاکستان کے درمیان کشیدگی میں اضافہ ہو گیا ہے۔ راجستھان کے ان سرحدی دیہاتوں میں جو بین الاقوامی سرحد کے قریب واقع ہیں، عوام ممکنہ حالات کے لیے تیار ہیں ،مقامی لوگوں کے مطابق، دیہاتوں میں شہریوں اور سیکیورٹی فورسز دونوں کے لیے بنکرز تعمیر کیے جا چکے ہیں تاکہ کسی بھی فوجی تصادم کی صورت میں فوری پناہ حاصل کی جا سکے۔ بھارتی فوج کی موجودگی علاقے میں مستقل چوکسی کی علامت بنی ہوئی ہے۔
پہہلگام میں 22 اپریل کو ہونے والے حملے میں 26 افراد جاں بحق ہوئے، پاکستان نے بھی سرحدوں پر اپنی عسکری سرگرمیوں میں اضافہ کر دیا ہے۔ بھارتی میڈیا نے دعویٰ کیا ہے کہ اطلاعات کے مطابق پاکستانی فوج نے اگلے مورچوں پر فضائی دفاعی نظام اور توپخانے تعینات کر دیے ہیں۔پاکستان ایئرفورس اس وقت تین بڑے مشقیں بیک وقت جاری رکھے ہوئے ہے: فضائے بدر، للکارِ مومن اور ضربِ حیدری۔ ان مشقوں میں ایف-16، جے-10 اور جے ایف-17 سمیت تمام اہم لڑاکا طیارے شامل ہیں۔
