حافظ نعیم الرحمان کا دھرنوں کا اعلان، حکومت کی پالیسیاں تنقید کا نشانہ

حیدرآباد: جماعت اسلامی کے امیر حافظ نعیم الرحمان نے 29 ستمبر کو پورے پاکستان میں دھرنے دینے کا اعلان کیا ہے۔ ایک جلسے سے خطاب کرتے ہوئے انہوں نے کہا کہ پہلے شٹر ڈاؤن ہڑتال کی گئی اور اب پہیہ جام ہڑتال کی جائے گی۔حافظ نعیم الرحمان نے پی ٹی آئی کی صورتحال کا حوالہ دیتے ہوئے کہا کہ جب ان کا لیڈر گرفتار ہوا تو پوری پارٹی تقسیم ہو گئی، جس سے ظاہر ہوتا ہے کہ یہ لوگ "ون مین آرمی” کے تحت جماعتیں چلانے کے خواہاں ہیں۔ انہوں نے جماعت اسلامی کے انتخابات کے عمل کو سراہا اور کہا کہ جماعت اسلامی جمہوریت کی بحالی اور آئین کی بالادستی کی تحریک کے لیے کوشاں ہے۔انہوں نے کہا کہ جماعت اسلامی کی ذمہ داری ہے کہ نوجوانوں کو بااختیار بنایا جائے، اور اس مقصد کے لیے "حق دو حیدرآباد” تحریک چلائی جا رہی ہے۔

حافظ نعیم الرحمان نے غزہ کے عوام کے حوالے سے بھی گفتگو کی اور کہا کہ ایک سال گزر جانے کے باوجود انہوں نے ہتھیار نہیں ڈالے، جبکہ 45 ہزار لوگ شہید ہوئے ہیں جن میں 30 ہزار بچے اور خواتین شامل ہیں۔ انہوں نے حکمرانوں کو تنقید کا نشانہ بناتے ہوئے کہا کہ جو لوگ اسرائیل کو قبول کرنے کے لیے بے چین ہیں، انہیں فلسطینیوں سے سبق سیکھنا چاہیے۔انہوں نے عوام سے 7 اکتوبر کو باہر نکلنے کی اپیل کی اور کہا کہ حکومتیں بھی ان کے حق کے لیے آواز بلند کریں۔ حافظ نعیم الرحمان نے یہ بھی کہا کہ جو حکمران عوام سے ناجائز بل لیتے ہیں، وہ ہی حیسکو، سیپکو، اور فیسکو کو کمپنسیٹ کریں گے۔ انہوں نے اس عزم کا اظہار کیا کہ جماعت اسلامی اس مقدمے کو پوری طاقت سے لڑے گی۔