سابق وفاقی وزیر اور سینیٹر فیصل واوڈا نے بشریٰ بی بی اور عمران خان کے حوالے سے سنگین الزامات عائد کیے ہیں
نجی ٹی وی جیو نیوز کے پروگرام "آج شاہ زیب خانزادہ کے ساتھ” میں بات کرتے ہوئے فیصل واوڈا نے کہا کہ جب بشریٰ بی بی عمران خان کی زندگی میں آئیں، تو اس کے بعد عمران خان کی سیاست میں بڑی تبدیلیاں دیکھنے کو ملیں۔بشریٰ بی بی کے اثر و رسوخ کے بعد عمران خان "گھڑی چور، مار دھاڑ پر یقین کرنے والے اور اداروں کے خلاف” ہوگئے۔ ایک "7 عورتوں کا گینگ” عمران خان کی سیاست کو اپنے مفاد کے لیے استعمال کرنے کی کوشش کر رہا ہے، "جو مرشد ہیں، وہی بانی پی ٹی آئی کی تباہی کے ذمہ دار ہیں”۔ انہوں نے دعویٰ کیا کہ وہ لوگ جو "ڈیل کے تحت باہر آئے ہیں، وہ جب ڈیل سے باہر جائیں گے، تو پھر حراست میں بھی جائیں گے۔” انہوں نے یہ بھی کہا کہ دھرنے کے دوران سب سے پہلے بشریٰ بی بی اور گنڈاپور بھاگے تھے۔ فیصل واوڈا کے مطابق بشریٰ بی بی "جان دینے کو تیار تھیں مگر فوٹیج میں یہ دکھایا گیا کہ وہ ٹہلتے ہوئے گاڑی میں بیٹھ رہی تھیں۔”
اس کے علاوہ فیصل واوڈا نے کہا کہ اگر بشریٰ بی بی عمران خان سے ملاقات کر کے "دم درود والا پانی پلائیں یا دہی کھلا دیں”، تو ریاست ان کی زندگی کی حفاظت کی ذمہ دار نہیں ہوگی۔ ان کا کہنا تھا کہ "اگر عمران خان کو بچانا ہے، تو یہی راستہ ہے کہ ان کی کسی سے ملاقات نہیں کرائی جائے۔”
فیصل واوڈا نے اس بات پر بھی زور دیا کہ پی ٹی آئی پر پابندی لگنے کے امکانات ہیں اور جلد ہی پی ٹی آئی سے مخلص لوگ نئی جماعت "پی ٹی آئی پاکستان” بنا کر سیاست میں اپنا کردار ادا کریں گے۔ ان کے مطابق، پی ٹی آئی کے موجودہ بحران کے بعد یہ نئی جماعت ملک کی سیاست میں اہم مقام حاصل کرے گی۔
