سعد فاروق
ترجمان وزارت خارجہ نے سابق امریکی قومی سلامتی مشیر جان بولٹن کے حالیہ بیان پر سخت ردعمل دیتے ہوئے کہا ہے کہ پاکستان اپنے جامع اور محفوظ جوہری سیکیورٹی نظام پر مکمل اعتماد رکھتا ہے اور اسے عالمی معیارات کے مطابق مضبوطی سے قائم کیا گیا ہے۔
باغی ٹی وی کے مطابق وزارت خارجہ کے ترجمان نے جان بولٹن کے بھارتی میڈیا ادارے کو دیے گئے انٹرویو کا حوالہ دیتے ہوئے کہا کہ یہ ستم ظریفی ہے کہ جان بولٹن کے ریمارکس ایک ایسے شخص (راج ناتھ سنگھ) کے بیان پر مبنی تھے جو ایک انتہا پسند ہندو تنظیم سے تعلق رکھتا ہے اور بارہا پاکستان کے خلاف جارحیت کی دھمکیاں دیتا رہا ہے۔ بین الاقوامی برادری کو اصل تشویش اس بات پر ہونی چاہیے کہ بھارت کے جوہری ہتھیار راج ناتھ سنگھ جیسے خطرناک سوچ کے حامل افراد کے ہاتھوں میں ہیں، جو پاکستان دشمنی اور مذہبی تعصب میں اندھے ہیں۔
ترجمان دفتر خارجہ نے بھارت کے جوہری سیکیورٹی فریم ورک پر بھی سنگین سوالات اٹھاتے ہوئے کہا کہ بھارت میں جوہری بلیک مارکیٹ کی بارہا اطلاعات نے دنیا کے سامنے اس کی جوہری سلامتی کے نظام کی ناکامی کو بے نقاب کیا ہے۔ متعدد مواقع پر حساس جوہری مواد کی چوری اور اسمگلنگ کے واقعات سامنے آ چکے ہیں۔”
پاکستان نے ایک بار پھر واضح کیا کہ اس کا جوہری کمانڈ اینڈ کنٹرول سسٹم انتہائی مضبوط اور محفوظ ہے۔ ترجمان کے مطابق ہم نے جوہری تحفظ کے تمام عالمی معیارات کو اپنایا ہے اور عالمی ادارے پاکستان کے نظام کو بارہا سراہ چکے ہیں۔”واضح رہے کہ یہ بیان سابق امریکی قومی سلامتی کے مشیر جان بولٹن کے بھارتی چینل کو دیے گئے بیان کے ردعمل میں سامنے آیا ہے، جس میں بولٹن نے بھارتی وزیر دفاع راج ناتھ سنگھ کے پاکستان سے متعلق جوہری بیانات کی توثیق کی تھی۔
راج ناتھ سنگھ کی جانب سے حالیہ دنوں میں پاکستان پر جوہری حملے کے حوالے سے بالواسطہ دھمکی آمیز بیانات دیے گئے تھے، جنہیں نہ صرف پاکستان بلکہ عالمی مبصرین نے خطرناک اور غیر ذمہ دارانہ قرار دیا تھا۔پاکستان نے عالمی برادری کو ایک بار پھر خبردار کیا ہے کہ بھارت کی قیادت میں بڑھتی ہوئی انتہاپسندی اور غیر ذمہ داری جوہری سلامتی کے لیے ایک سنجیدہ خطرہ ہے، جب کہ پاکستان اپنی جوہری پالیسی اور سیکیورٹی پر مکمل پراعتماد ہے۔
مغرب کو احساس ہو گیا، جس گھوڑے پر داؤ لگایا وہ پاکستان سے ہار گیا،انوار الحق کاکڑ
آئی ایم ایف کا پاکستان کے معاشی ایجنڈے پر اعتماد، تعاون جاری رکھنے کی یقین دہانی
آئی ایم ایف کا پاکستان کے معاشی ایجنڈے پر اعتماد، تعاون جاری رکھنے کی یقین دہانی
