ڈیرہ غازی خان (جواد اکبر) ڈپٹی کمشنر محمد عثمان خالد کی ہدایت پر ضلعی انتظامیہ اور پنجاب فوڈ اتھارٹی نے عوامی صحت کے تحفظ کے لیے چوک چورہٹہ عزیز آباد روڈ پر مشترکہ کارروائی کی۔ اس کارروائی کی نگرانی اسسٹنٹ کمشنر ہیڈ کوارٹر نذر حسین کورائی نے کی۔
کارروائی کے دوران کریانہ کی پانچ دکانوں سے بچوں کے کھانے پینے کی اشیاء، جن میں سلانٹی، چرمر، ٹافیاں اور دیگر آئٹمز شامل تھیں، برآمد کی گئیں۔ برآمد شدہ سامان کی مالیت تقریباً 15 لاکھ روپے تھی، جسے موقع پر ہی تلف کر دیا گیا۔ اس کے علاوہ خلاف ورزی کرنے والے دکانداروں پر مجموعی طور پر 70 ہزار روپے جرمانہ عائد کیا گیا۔
اسسٹنٹ کمشنر نذر حسین کورائی نے کہا کہ ڈپٹی کمشنر محمد عثمان خالد کی ہدایت پر شہریوں، خصوصاً بچوں کو صحت مند اور محفوظ غذا کی فراہمی کے لیے تمام ممکنہ اقدامات کیے جا رہے ہیں۔ دکانداروں کو ہدایت کی گئی ہے کہ وہ اپنی دکانوں میں موجود اشیاء کی معیاد باقاعدگی سے چیک کریں اور مدت پوری ہونے سے پہلے انہیں تلف کریں، بصورت دیگر سخت قانونی کارروائی عمل میں لائی جائے گی اور کوئی عذر قابل قبول نہیں ہوگا۔
