تنگوانی،باغی ٹی وی (نامہ نگارمنصوربلوچ) بخشاپور کے قریب ٹھل کے صحافی نبی بخش کنرانی کے اغوا کا مبینہ واقعہ پیش آیا۔ مبینہ مغوی صحافی کی گاڑی لاوارث حالت میں ملی جبکہ اغوا کا شبہ ڈاکوؤں پر ظاہر کیا جا رہا ہے۔
تفصیلات کے مطابق نبی بخش کنرانی جو پی ایف یو جے کے ضلعی یونٹ جیکب آباد یونین آف جرنلسٹس کے ممبر اور ٹھل کے سینئر صحافی ہیں، ضلع کشمور کے تھانہ بخشاپور کی حدود سے مبینہ طور پر اغوا ہوئے ہیں۔ مغوی کے سسر دلبر کنرانی نے بتایا کہ صبح کے وقت نبی بخش ان کی مہران کار لے کر کسی کام کے سلسلے میں بخشاپور گئے تھے۔ شام تک ان سے رابطہ نہ ہو سکا اور ان کے موبائل فون بند ملے۔
بعد ازاں بخشاپور تھانے کے ایس ایچ او نے اطلاع دی کہ مہران کار لاوارث حالت میں ملی ہے۔ گاڑی سے ایک پرچی برآمد ہوئی جس پر درج نمبر پر رابطہ کرنے پر دلبر کنرانی کا نمبر ظاہر ہوا۔ اس سے یہ تاثر ملتا ہے کہ نبی بخش کنرانی کو ڈاکو اغوا کرکے لے گئے ہیں اور ان کی کار لاوارث چھوڑ دی گئی۔
پولیس اور مغوی کے ورثا ءنے فوری طور پر تلاش شروع کر دی ہے۔ واقعے نے صحافی برادری اور مقامی لوگوں میں تشویش کی لہر دوڑا دی ہے۔
