کراچی میں کرنٹ لگنے سے3 نوجوانوں کی ہلاکت کیس،کے الیکٹرک کا مالک مفرور قرار

سٹی کورٹ کراچی میں کرنٹ لگنے سے3 نوجوانوں کی ہلاکت کیس کی سماعت ہوئی

باغی ٹی وی کی رپورٹ کے مطابق درخشاں پولیس نے کے الیکٹرک کے مالک ،سی ای او و دیگر کو مفرور قرار دے دیا ،پولیس نے 12روز کی تاخیر کے بعد رپورٹ سٹی کورٹ میں جمع کرا دی .پولیس نے ملزمان کی گرفتاری کے لیے14دن کی مہلت طلب کرلی

پولیس کی جانب سے عدالت میں جمع کروائی گئی رپورٹ میں کہا گیا کہ 11اگست کوکرنٹ لگنے سے فیضان،حمزہ ،طلحٰہ اورتنویر جاں بحق ہوئے،13اگست کو حمزہ کے والد طارق محمود کی مدعیت میں مقدمہ درج ہوا

مقدمے میں کے الیکٹرک کے مالک عارف نقوی، سی ای او کے الیکٹرک عبداللہ مونس علوی اور چیئرمین اکرام سہگل و دیگرکے الیکٹرک کے دیگر افسران کو نامزد کیا گیا ہے۔ مقدمے میں قتل بلاسبب کی دفعہ322 بھی شامل کی گئی ہے ۔ مقدمے کے اندراج کے لیے درخشاں تھانے میں 6گھنٹے تک مقتولین کے ورثا اور اعلیٰ پولیس افسران کے درمیان مذاکرات چلتے رہے ۔

نیشنل الیکٹرک پاور ریگولیٹری اتھارٹی (نیپرا) کی جانب سے جاری اعلامیے میں بتایا گیا ہےکہ کراچی میں بارشوں کے بعد کرنٹ سے ہلاکتیں ہوئیں اور بجلی بھی معطل رہی جس پر کے الیکٹرک کے خلاف باضابطہ تحقیقات شروع کردی گئی ہیں۔

اعلامیے میں کہا گیا ہےکہ بادی النظر میں یہ حقائق نیپرا قوانین کی خلاف ورزی ہیں، سینئر افسران پر مشتمل ٹیم تحقیقات کے لیے تعینات ہے اور ٹیم 15 دن میں اپنی تحقیقات مکمل کرے گی۔

واضح‌رہے اس سے قبل کراچی پولیس نے شہریوں کی کرنٹ لگنے سے ہلاکت پر کے الیکٹرک کے خلاف مقدمہ درج کیا تھا ۔تفصیلات کے مطابق حالیہ بارشوں کے باعث ڈیفنس میں کرنٹ لگنے سے جاں بحق تینوں افراد کے ورثہ نے مئیر کراچی وسیم اختر کی موجودگی میں درخشاں تھانے میں ایف آئی آر درج کرائی ، میڈیا سے بات چیت کرتے ہوئے میئر کراچی وسیم اختر کا کہنا تھا کہ بارشوں میں کرنٹ لگنے کے باعث جاں بحق دیگر افراد کی ایف آئی آر بھی درج جائیگی۔