کندھ کوٹ (باغی ٹی وی، نامہ نگار مشتاق علی لغاری)کندھ کوٹ میں ضلع بھر کی صورتحال ایک بار پھر کشیدہ ہو گئی۔ رات گئے نامعلوم مسلح افراد کی فائرنگ سے چولیانی برادری کے باپ بیٹا قتل جبکہ ایک شخص زخمی ہوگیا۔ زخمی اور جاں بحق افراد کو اسپتال منتقل کر دیا گیا۔
واقعے کے بعد ورثا اور برادری کے افراد نے قاتلوں کی عدم گرفتاری کے خلاف انڈس ہائی وے کرمپور کے مقام پر نعشیں رکھ کر دھرنا دے دیا، جس کے باعث شاہراہ مکمل طور پر بلاک ہوگئی اور گاڑیوں کی طویل قطاریں لگ گئیں۔ دور دراز سے آنے والے مسافر شدید پریشانی کا شکار رہے۔
ورثا کا کہنا ہے کہ ہمارے نوجوانوں کو گاڈھی اوگاہی اور بنگلانی کے افراد نے قتل کیا اور پولیس تاحال ملزمان کو گرفتار نہیں کر سکی۔ مظاہرین نے واضح کیا کہ جب تک قاتل گرفتار نہیں ہوتے، دھرنا جاری رہے گا۔
