کندھ کوٹ: مزاحمت پر ڈاکوؤں نے نوجوان کو قتل کر کے موٹر سائیکل چھین لی

تگوانی ،باغی ٹی وی(نامہ نگار منصور بلوچ) کندھ کوٹ کے قریب دبئی ہوٹل اڈس ہائی وے روڈ پر ڈاکوؤں نے موٹر سائیکل چھیننے کی کوشش کے دوران مزاحمت کرنے پر 22 سالہ نوجوان عابد علی بھیو کو گولی مار کر قتل کر دیا۔

ذرائع کے مطابق، نوجوان نے بہادری سے مزاحمت کی، تاہم ڈاکوؤں نے فائرنگ کر کے اسے موت کے گھاٹ اتار دیا اور موٹر سائیکل لے کر با آسانی فرار ہو گئے۔ پولیس نے مقتول کی لاش کو پوسٹ مارٹم کے بعد ورثہ کے حوالے کر دیا ہے۔

واقعے کے بعد شہید کے گھر میں غم اور ماتم کی فضا چھا گئی ہے، جبکہ عوام میں خوف و ہراس پایا جا رہا ہے۔ مقامی افراد نے پولیس سے فوری کارروائی اور ملزمان کی گرفتاری کا مطالبہ کیا ہے۔