کشمور،باغی ٹی وی (نامہ نگارمختیار احمد اعوان) ضلع کشمور ایٹ کندھ کوٹ میں خواتین کونسلرز کو مقامی حکومت کے قوانین اور آفات سے نمٹنے کی مہارتوں سے آراستہ کرنے کے لیے تربیتی سیشنز کا انعقاد کیا گیا۔ یہ اقدام "مضبوط خواتین رہنما، آفات مزاحم مقامی حکومت کی ترقی” کے تحت کیا جا رہا ہے، جس کا مقصد خواتین کو مقامی حکومتوں میں مؤثر کردار ادا کرنے کے قابل بنانا ہے۔
تربیتی سیشنز مقامی حکومتوں کی ایسوسی ایشن فار ڈویلپمنٹ آف لوکل گورننس (ADLG) اور امریکی ادارہ برائے امن (USIP) کے تعاون سے منعقد کیے گئے۔ ان میں یونین کونسل، تحصیل، اور ضلعی سطح کی خواتین کونسلرز نے شرکت کی۔
تربیت میں خواتین کو نہ صرف مقامی حکومت کے قوانین سے آگاہ کیا گیا بلکہ آفات سے قبل اور بعد کی حکمت عملیوں پر بھی تفصیلی رہنمائی دی گئی۔ اس پروگرام کا مقصد خواتین کونسلرز کی خوداعتمادی بڑھانا، انہیں فعال کردار کے لیے تیار کرنا، اور آفات کے دوران بہتر فیصلے لینے کی صلاحیت پیدا کرنا ہے۔
ضلعی چیئرمین اور لوکل کونسل ایسوسی ایشن کے صدر گل محمد جکرانی نے اس موقع پر کہا کہ یہ تربیتی سیشنز خواتین کی کمیونٹیز میں مثبت تبدیلیاں لانے کا باعث بنیں گے۔ انہوں نے تربیت میں شرکت کرنے والی کونسلرز کو اعزازی سرٹیفکیٹ بھی پیش کیے۔
یہ دو روزہ سیشنز سندھ کے اضلاع دادو، گھوٹکی، جیکب آباد، خیرپور، شکارپور، سکھر، نوشہرو فیروز، اور بلوچستان کے اضلاع جعفرآباد، نصیرآباد، صحبت پور، جھل مگسی، اوستہ محمد، اور کچھی میں منعقد کیے جا رہے ہیں، جن کے نتائج خواتین قیادت اور مقامی حکومتوں کے نظام میں نمایاں بہتری کی صورت میں متوقع ہیں۔
