شعیب اخترکا پاک بھارت کرکٹ سیریز کا خواب کپل دیونے چکنا چورکردیا،بہت سخت جواب

لاہور:شعیب اخترکا پاک بھارت کرکٹ سیریز کا خواب کپل دیونے چکنا چورکردیا،بہت سخت جواب ،اطلاعات کےمطابق کورونا متاثرین کی امداد کیلئے شعیب اختر کی پاک بھارت کرکٹ میچ کی تجویز سابق بھارتی کپتان کپل دیو نے مسترد کر دی۔

کپل دیو نے انٹرویو میں کہا کہ بھارت کو پیسوں کی ضرورت نہیں، موجودہ حالات میں کسی صورت کرکٹ سیریز کرانے کا خطرہ مول نہیں لیا جا سکتا، بحرانی صورتحال سے نمٹنے کیلئے ہمارے پاس وسائل موجود ہیں، بھارتی کرکٹ بورڈ نے بھی51 کروڑ روپے کا فنڈ دیا، اگر ضرورت پڑی تو مزید رقم بھی جمع کرانے کی طاقت ہے۔

انھوں نے کہا کہ ابھی 5 یا 6 ماہ تک کرکٹ دوبارہ شروع ہونے کا امکان نظر نہیں آرہا، موجودہ صورتحال میں صحت اور سلامتی کیلئے ہرممکن احتیاطی تدابیر اختیار کرنا اہمیت رکھتا ہے، کسی بھی نوعیت کا میچ کرانا بہت بڑا خطرہ مول لینے کے مترادف ہوگا، اس لیے شعیب اختر کی تجویز کسی طور پر بھی قابل عمل نہیں لگتی۔

اس سے قبل پاکستان کے باولنگ سپیڈ سٹار شعیب نے تجویر دی تھی کہ کورونا متاثرین کی امداد کیلئے روایتی حریفوں کے درمیان دبئی میں ون ڈے سیریز کرائی جائے، صرف ٹی وی پر میچزنشر کرنے سے حاصل شدہ آمدنی دونوں ملکوں کے ضرورتمندوں کے کام آسکتی ہے۔