کراچی کے علاقے مومن آباد میں ایک تین منزلہ عمارت اچانک گر گئی، جس سے ہلچل مچ گئی۔ ریسکیو حکام کے مطابق عمارت کے ملبے سے 4 افراد کو زخمی حالت میں نکالا گیا ہے۔ زخمیوں کو فوری طور پر قریبی اسپتال منتقل کر دیا گیا ہے جہاں ان کا علاج جاری ہے۔
حکام کا کہنا ہے کہ عمارت کے ملبے میں مزید افراد کے دبے ہونے کا خدشہ ظاہر کیا جا رہا ہے، اس لیے ریسکیو ٹیمیں ملبہ ہٹانے اور دیگر متاثرین کی تلاش میں مصروف ہیں۔واقعہ کی ابتدائی تحقیقات کے مطابق، ایس ایس پی ویسٹ طارق مستوئی نے بتایا کہ عمارت گرنے سے کچھ دیر پہلے ایک دھماکہ ہوا، جس کے فوراً بعد عمارت میں آگ بھڑک اٹھی۔ دھماکے کے باعث ایک شخص آگ سے جھلس کر زخمی ہوا ہے۔ ان کا کہنا تھا کہ عمارت میں ایک سیاسی جماعت کا دفتر قائم تھا، ریسکیو حکام اور پولیس واقعہ کی مزید تحقیقات کر رہی ہے تاکہ دھماکے کی اصل وجوہات کا پتہ چلایا جا سکے اور متاثرین کو جلد از جلد امداد فراہم کی جا سکے۔
موقع پر موجود ریسکیو اہلکار اور پولیس کی اضافی نفری تعینات کر دی گئی ہے تاکہ کسی بھی ممکنہ متاثرہ شخص کی فوری مدد کی جا سکے اور علاقے میں مزید حفاظتی اقدامات کیے جا سکیں۔
