کراچی: کراچی کے بین الاقوامی ایئرپورٹ پر ایک بین الاقوامی کارگو کمپنی کے طیارے سے گاڑی ٹکرا گئی۔
ایئرپورٹ ذرائع کے مطابق حادثہ اس وقت پیش آیا جب طیارہ پارکنگ ایریا میں کھڑا تھا۔ ایک لوڈر ٹرک اچانک طیارے سے جا ٹکرایا، جس کے باعث طیارے کو نقصان پہنچا۔ابتدائی اطلاعات کے مطابق لوڈر ٹرک کے بریک فیل ہونے کا امکان ہے، جس کی وجہ سے وہ کنٹرول سے باہر ہو گیا اور طیارے سے ٹکرا گیا۔ حادثے کے فوراً بعد طیارے کو گراؤنڈ کر دیا گیا ہے تاکہ مزید نقصان سے بچا جا سکے اور حفاظتی اقدامات یقینی بنائے جا سکیں۔
ائیرپورٹ حکام کا کہنا ہے کہ نقصان کا تفصیلی جائزہ لیا جا رہا ہے تاکہ مرمت اور نقصان کا تخمینہ لگایا جا سکے۔ ایوی ایشن حکام نے اس واقعے کی تحقیقات کا آغاز کر دیا ہے تاکہ حادثے کی اصل وجوہات معلوم کی جا سکیں اور آئندہ ایسے واقعات سے بچاؤ کے لیے ضروری اقدامات کیے جا سکیں۔
