کراچی،باغی ٹی وی (ڈاکٹربشیربلوچ نمائندہ خصوصی) نادرا کی بائیکرز سروس، شہریوں کے لیے بڑی سہولت
تفصیل کے مطابق نادرا نے شہر قائد میں شہریوں کی سہولت کے لیے ایک نئی اور جدید سروس متعارف کروا دی ہے، جس سے شہریوں کو طویل انتظار اور قطاروں سے نجات ملے گی۔
نادرا حکام کے مطابق کراچی ریجن میں بائیکرز سروس کا آغاز کیا جا رہا ہے، جو پیر کے روز سے فعال ہوگی۔ اس سروس کے ذریعے شہری قومی شناختی کارڈ کے اجرا، تجدید اور دیگر متعلقہ خدمات سے اپنے گھر کی دہلیز پر مستفید ہو سکیں گے۔
ابتدائی مرحلے میں کراچی میں تین بائیکرز، جبکہ حیدرآباد اور میرپورخاص میں ایک، ایک بائیک کے ذریعے یہ سروس فراہم کی جائے گی۔ حکام نے اسے شہریوں کی زندگی آسان بنانے کی جانب ایک اہم قدم قرار دیا ہے۔
یہ اقدام نادرا کی جانب سے شہریوں کے مسائل کے فوری حل اور سہولت کی فراہمی کے لیے کی جانے والی کاوشوں کا تسلسل ہے۔
