نواز شریف پنجاب کے لیے اشرفیاں لٹا رہے ہیں، کراچی کو نظرانداز کیا جا رہا ہے،فاروق ستار

کراچی(باغی ٹی وی رپورٹ) نواز شریف پنجاب کے لیے اشرفیاں لٹا رہے ہیں، کراچی کو نظرانداز کیا جا رہا ہے،فاروق ستار

تفصیل کے مطابق کراچی میں ایم کیو ایم رہنما امین الحق اور اپوزیشن لیڈر علی خورشیدی کے ہمراہ پریس کانفرنس کرتے ہوئے فاروق ستار کا کہنا تھا کہ کراچی کے عوام کو مہنگائی اور ناانصافی کی چکی میں پسا جا رہا ہے، ناانصافیوں، ظلم، جبر، امتیاز کا نہ ختم ہونے والا سلسلہ جاری ہے۔

انہوں نے کہا کہ کراچی سب سے زیادہ ٹیکس دیتا ہے، پنجاب میں بجلی کی قیمتوں میں ریلیف دیا گیا، صرف پنجاب کو ریلیف ملنا امتیازی سلوک ہے، سندھ کے لوگ بھی ریلیف کے حقدار ہیں، کراچی والوں کو بھی پنجاب کی طرح 14 روپے فی یونٹ کم کئے جائیں۔

ایم کیو ایم پاکستان کے سینئر رہنما فاروق ستار نے کراچی میں بجلی کے بلوں میں اضافے پر شدید احتجاج کرتے ہوئے حکومت پر تنقید کی بوچھاڑ کر دی ہے۔ انہوں نے کہا کہ نواز شریف اپنی بیٹی کے ساتھ مل کر پنجاب کے لیے تو اشرفیاں لٹا رہے ہیں لیکن کراچی والوں کو نظرانداز کیا جا رہا ہے۔

میڈیا سے گفتگو کرتے ہوئے فاروق ستار نے کہا کہ اگر حکومت نے ہوش کے ناخن نہ لیے تو کراچی میں انارکی اور انتشار پھیل سکتا ہے۔ انہوں نے کہا کہ لوگوں کو خودکشی کی جانب دھکیلنے کی کوشش کی جا رہی ہے۔ انہوں نے مطالبہ کیا کہ پنجاب کو جو 14 روپے فی یونٹ کا ریلیف دیا گیا ہے وہ کراچی کو بھی دیا جائے۔

فاروق ستار نے کہا کہ ماڑی گیس فیلڈ پر جو 100 ملین کیوبک گیس بچی ہوئی ہے وہ گیس واپڈا کو دینے کے بجائے کراچی کو دی جائے تاکہ سستی بجلی پیدا کی جا سکے۔ انہوں نے کہا کہ سندھ حکومت کو تین ماہ کا ریلیف دینا چاہیے۔

انہوں نے مزید کہا کہ بجلی کے یونٹ میں 3 سے 5 روپے بڑھانے کا نوٹیفکیشن واپس لیا جائے اور سندھ حکومت کو فوری طور پر ریلیف دیا جائے۔ انہوں نے کہا کہ ٹیکسوں کی بھرمار کی وجہ سے کراچی کی صنعتیں پنجاب منتقل ہو رہی ہیں۔

فاروق ستار نے کہا کہ کراچی کی برآمدات تیزی سے گر رہی ہیں اور پنجاب کو 12 سینٹ فی یونٹ جبکہ کراچی کو 19 سینٹ فی یونٹ بجلی مل رہی ہے جو کہ کراچی کی صنعتوں کو تباہ کرنے کا منصوبہ ہے۔

فاروق ستار نے خبردار کیا کہ اگر حکومت نے کراچی کے مسائل حل نہ کیے تو سول نافرمانی ہو سکتی ہے۔