کراچی (باغی ٹی وی) گرینڈ ڈیموکریٹک الائنس (جی ڈی اے) اور جمعیت علمائے اسلام (جے یو آئی) سندھ کے رہنماؤں کا اہم مشاورتی اجلاس آج کراچی میں منعقد ہوا، جس میں بھارتی جارحیت کی شدید الفاظ میں مذمت کرتے ہوئے وطنِ عزیز کے دفاع میں پاک فوج کے ساتھ کھڑے ہونے کا عزم کیا گیا۔
اجلاس میں جی ڈی اے کے چیف کوآرڈینیٹر سید صدرالدین شاہ راشدی، جے یو آئی سندھ کے امیر مولانا عبد القیوم ہالیجوی، مولانا راشد محمود سومرو، ڈاکٹر صفدر عباسی، سردار عبدالرحیم، سید زین شاہ، مظہر راہوجو، معظم عباسی، مظفر بروہی، مولانا عبدالکریم عابد، قاری عثمان، غلام سرور بلیدی، رفیق احمد سومرو، حسین آصفی اور دیگر اہم رہنما شریک ہوئے۔
رہنماؤں نے بھارت کے رات کے اندھیرے میں کیے گئے بزدلانہ حملے کو کھلی جارحیت قرار دیا اور معصوم شہریوں کی شہادت پر گہرے دکھ کا اظہار کیا۔ اجلاس کے دوران شہداء کے درجات کی بلندی، زخمیوں کی جلد صحتیابی، اور افواجِ پاکستان کے حوصلے و استقامت میں اضافے کے لیے دعا بھی کی گئی۔
سید صدرالدین شاہ راشدی اور مولانا راشد محمود سومرو نے مشترکہ موقف اختیار کرتے ہوئے کہا کہ ملک کی سرحدوں کی حفاظت کے لیے جی ڈی اے اور جے یو آئی کے کارکنان ہر محاذ پر پاک فوج کے شانہ بشانہ کھڑے ہوں گے۔ حر فورس اور انصار السلام کے کارکنان وطن کی سالمیت پر کوئی آنچ نہیں آنے دیں گے۔
رہنماؤں نے ملکی نازک حالات کے پیش نظر 18 مئی کو باغ جناح کراچی میں منعقد ہونے والا جلسہ عام ملتوی کرنے کا اعلان کرتے ہوئے کہا کہ وطن عزیز ہم سب کے لیے اولین ترجیح ہے۔ اگر ملک سلامت ہے تو ہم سب سلامت ہیں۔ اس لیے ہم سیاسی سرگرمیاں روک کر اپنی فوج کے ساتھ کھڑے ہیں۔
آخر میں اعلان کیا گیا کہ پوری قوم متحد ہے اور بھارتی جارحیت کے خلاف سیسہ پلائی دیوار بن کر دشمن کو منہ توڑ جواب دے گی۔
