میئر کراچی بیرسٹر مرتضیٰ وہاب نے شہریوں کو بہتر سہولیات فراہم کرنے کے لیے ایک اور اہم اقدام اٹھاتے ہوئے واٹر کارپوریشن کی خصوصی رعایتی پالیسی میں تین ماہ کی مزید توسیع کی منظوری دے دی جس کے بعد واٹر کارپوریشن نے اپنے تمام ریٹیل صارفین کے بلوں کے بقایاجات کی ادائیگی کے لیے رعایتی اسکیم میں 3 ماہ کی مزید مدت کے لیے 30 اپریل 2025 تک اضافہ کرلیا .
اس حوالے سے میئر کراچی بیرسٹر مرتضیٰ وہاب کا کہنا تھا کہ رعایتی پالیسی کا بنیادی مقصد شہریوں کو بہتر سہولیات فراہم کرنا ہے کیونکہ اس پالیسی کے تحت شہریوں کو آسان اقساط میں واٹر کارپوریشن کے بقایاجات جمع کروانے کا موقع ملے گا انہوں نے شہریوں سے درخواست کرتے ہوئے کہا کہ وہ اس مہم سے بھرپور فائدہ اٹھاتے ہوئے واٹر کارپوریشن کے بقایاجات بروقت ادا کریں جس سے واٹر کارپوریشن کی آمدنی میں اضافے کی صورت میں شہریوں کو فراہمی و نکاسی آب کی مزید بہتر سہولیات فراہم کی جائیں گی انکا مزید کہنا تھا کہ شہریوں کو فراہمی و نکاسی کی بہتر سہولیات فراہم کرنا ہماری اولین ترجیحات میں شامل ہے اور اس سلسلے میں سندھ حکومت بھرپور اقدامات کر رہی ہے ترجمان واٹر کارپوریشن کے مطابق میئر کراچی کی ہدایت پر تمام ریٹیل صارفین کو بہتر سہولیات فراہم کرنے کے لیے رعایتی پالیسی کی مدت کو بڑھایا گیا ہے کیونکہ اس پالیسی کی تحت وہ تمام ریٹیل صارفین مستفید ہونگے جنہوں نے اب تک واٹر کارپوریشن کے بقایاجات ادا نہیں کیے جبکہ پالیسی کے تحت تمام ریٹیل صارفین کو اپنے بقایاجات جمع کروانے پر رعایت کے ساتھ اقساط کی سہولت بھی فراہم کی جائے گی اور وہ ریٹیل صارفین جو اپنے بقایاجات یک مشت جمع کروائیں گے تو انہیں 35 فیصد 6 ماہ کے اندر ادائیگی کرنے والوں کو 25 فیصد 9 ماہ میں 20 فیصد ایک سال میں 15 فیصد اور 15 ماہ میں اپنے بقایاجات جمع کروانے والوں کو 10 فیصد رعایت دی جائے گی لہٰذا عوام الناس سے گزارش ہے کہ اس رعایتی پالیسی سے بھرپور فائدہ اٹھائیں جبکہ مقررہ تاریخ کے بعد تمام نادہندگان کے خلاف واٹر کارپوریشن کے نئے ایکٹ کے سیکشن 40 کے تحت بھرپور کاروائیاں کی جائیں گی
واضح رہے کہ گزشتہ 3 ماہ میں رعایتی پالیسی سے واٹر کارپوریشن کی آمدنی میں ماہانہ 20 کروڑ روپے اضافہ ہوا انہوں نے مزید بتایا کہ صارفین اپنے رعایتی بلز حاصل کرنے کے لیے متعلقہ ڈپٹی ڈائریکٹر ٹیکسز کے دفتر سے رابطہ کریں جبکہ کسی بھی قسم کی شکایت یا مزید معلومات کے لیے ہیلپ لائن نمبر 1334 پر رابطہ کریں۔
