مقبوضہ کشمیر میں بھارتی فوج کے ہاتھوں کمسن بچیوں کی عزتیں غیر محفوظ
باغی ٹی وی کی رپورٹ کے مطابق بھارتی فوج کے ہاتھوں کمسن بچیوں کی عزتیں غیر محفوظ ہو گئیں،کمسن بچی پر بے ہودہ اورفحش تبصرے کرنے پر فوجیوں کے خلاف کشمیری عوام نے مظاہرہ کیا ہے
ہفتہ کو شمالی کشمیر کے سنگھ پورہ کے علاقے میں بھارتی فوجیوں کی طرف سے ایک کمسن بچی پرفحش تبصرے کرنے کے بعد لوگوں نے احتجاجی مظاہرہ کیا،فوجیوں کی معافی کے بعد آرمی کے ایک کمانڈنگ آفیسر نے مشتعل ہجوم کو راضی کیا اور اس معاملے کو بڑھنے سے روک دیا ۔
ساوتھ ایشین وائر کے مطابق خانپھتھ کیمپ میں تعینات 29 راشٹریہ رائفلز کے فوجی سنگھ پورہ کے علاقے میں ایک گاڑی میں گشت کر رہے تھے کہ ایک بھارتی فوجی نے ایک کمسن بچی پر بے ہودہ تبصرے کیے۔ اس لڑکی نے لوگوں کی توجہ اپنی طرف مبذول کراتے ہوئے شور مچایا۔ اسی اثنامیں، بہت سارے لوگ جمع ہوگئے اور آزادی کے حامی اوربھارتی فوج مخالف نعرے بلند کرنے شروع کردیئے۔
مظاہرین نے مطالبہ کیا کہ اس فوجی کوفوری گرفتارکیا جائے۔ ایک بزرگ نے کہاکہ فحش گفتگو کے بعد ، سپاہی نے اسے دھمکی بھی دی ۔ ہم اسے برداشت نہیں کریں گے۔
کشمیریوں کی جانب سے احتجاج کے بعد ایس ڈی پی او ظفر مہدی اور چوکی آفیسر میرگنڈ پولیس چوکی محمد اشرف کی سربراہی میں پولیس ٹیم مظاہرین کو راضی کرنے کے لئے جائے وقوعہ پر پہنچ گئی۔ ایس ڈی پی او پتن نے کہا کہ وہ اب بھی معاملے کی تصدیق کر رہے ہیں۔ چوکی افسر محمد اشرف نے ساوتھ ایشین وائر کو بتایا کہ اگرچہ فوج کے سپاہی نے کچھ نہیں کیا ، پھر بھی کمانڈنگ آفیسر نے لوگوں سے معافی مانگی اور انھیں تسلی دی۔
