کندھ کوٹ (باغی ٹی وی،نامہ نگار مختیار اعوان) صوبائی محتسب اعلیٰ کے حکم پر عوامی مسائل کے فوری حل کے لیے ڈسٹرکٹ اکاؤنٹس آفس کشمور ایٹ کندھ کوٹ میں کھلی کچہری کا انعقاد کیا گیا، جس کی صدارت ریجنل ڈائریکٹر محتسب اعلیٰ زاہد حسین برڑو نے کی۔ کچہری میں سرکاری ملازمین کی پنشن، ریٹائرمنٹ اور درستگی سے متعلق مسائل سنے گئے اور ان کے فوری حل کے لیے موقع پر ہدایات جاری کی گئیں۔
اس موقع پر ڈائریکٹر محتسب اعلیٰ زاہد حسین برڑو نے خطاب کرتے ہوئے کہا کہ صوبائی محتسب اعلیٰ کی ہدایت پر ہم عوام کے مسائل ان کی دہلیز پر حل کرنے کے لیے آئے ہیں تاکہ سرکاری دفاتر سے متعلق شکایات کا بروقت ازالہ کیا جا سکے۔
کھلی کچہری میں شہریوں نے پنشن کے اجرا میں تاخیر، ریٹائرمنٹ فوائد اور دستاویزی غلطیوں کی نشاندہی کی، جن پر ریجنل ڈائریکٹر نے متعلقہ افسران کو فوری اقدامات کی ہدایت دی۔ کچہری میں ڈسٹرکٹ اکاؤنٹس آفیسر عبدالرسول ابڑو، اکاؤنٹنٹ شميم، غلام مرتضیٰ سیٹھار، سید واجد شاہ، عبدالواحد سمیت دیگر متعلقہ افسران بھی شریک ہوئے۔
عوامی سطح پر اس اقدام کو سراہا گیا اور سرکاری امور میں شفافیت و سہولت کے فروغ کی امید ظاہر کی گئی۔
