قصور (ڈسٹرکٹ رپورٹر،طارق نوید سندھو): بہادر پورہ کے قریب مبینہ پولیس مقابلے کے دوران ایک مسلح ڈاکو اپنے ساتھیوں کی فائرنگ کا نشانہ بن کر ہلاک ہو گیا۔ پولیس ذرائع کے مطابق، ڈاکو لوٹ مار میں مصروف تھے کہ ایک شہری نے 15 پر کال کرکے پولیس کو اطلاع دی۔ پولیس نے موقع پر پہنچ کر ڈاکوؤں کو روکنے کی کوشش کی تو انہوں نے فائرنگ کر دی۔
مقامی ذرائع کے مطابق، ڈاکوؤں کی اپنی فائرنگ کے نتیجے میں ہی ایک ڈاکو موقع پر ہلاک ہو گیا۔ ہلاک ہونے والے ڈاکو کی شناخت اشتیاق عرف ببلی کے نام سے ہوئی ہے اور اس کی لاش ہسپتال منتقل کر دی گئی ہے۔
خیال رہے کہ گزشتہ روز بھی قصور میں دو مبینہ پولیس مقابلوں کے دوران تین ڈاکو ہلاک ہو گئے تھے۔ دونوں طرفہ فائرنگ کے نتیجے میں تینوں ڈاکو اپنے ہی ساتھیوں کی فائرنگ سے جان سے گئے تھے۔ ہلاک ہونے والے ڈاکوؤں کی شناخت جبار، ذیشان اور علی رضا کے ناموں سے ہوئی تھی۔
پولیس حکام نے بتایا کہ گرفتار ہونے والے یا ہلاک ہونے والے ڈاکوؤں کے خلاف مقدمات درج ہیں اور علاقے میں امن و امان برقرار رکھنے کے لیے اضافی نفری تعینات کر دی گئی ہے۔
