قصور،باغی ٹی وی (ڈسٹرکٹ رپورٹرطارق نوید سندھو) میڈم شازیہ رفیق ڈی ای او فیملی ایجوکیشن قصورتعینات، بہتر تعلیمی نظام کے عزم کا اظہار
میڈم شازیہ رفیق نے بطور ڈسٹرکٹ ایجوکیشن آفیسر (فیملی ایجوکیشن) قصور اپنی ذمہ داریاں سنبھال لیں۔ اس موقع پر انہوں نے پریس کانفرنس میں اپنے ساتھیوں، میڈیا نمائندگان اور خصوصی طور پر باغی ٹی وی کا شکریہ ادا کیا، جنہوں نے ان کا پرتپاک استقبال کیا۔
میڈم شازیہ رفیق کا کہنا تھا کہ انہوں نے 25 جنوری 2025 کو کمپیٹیٹو امتحان کے ذریعے ایڈمنسٹریٹو پوسٹ جوائن کی۔ ان کا مزید کہنا تھا کہ پنجاب بھر میں ایجوکیشن ایڈمنسٹریٹو سیٹوں کو کمپیٹیٹو امتحانات کے ذریعے پُر کرنے کی پالیسی کے تحت انہیں اس عہدے پر تعینات کیا گیا۔
انہوں نے اپنے اہل خانہ، خاص طور پر اپنے بھائی کی حمایت کا شکریہ ادا کیا، جنہوں نے ہمیشہ ان کی حوصلہ افزائی کی اور چاہا کہ وہ قصور میں خدمات انجام دیں۔ ان کا کہنا تھا کہ وہ اپنی ٹیم کے ساتھ مل کر تعلیمی میدان میں بہتری لانے کے لیے پرعزم ہیں اور عوام کی توقعات پر پورا اتریں گی۔
میڈم شازیہ رفیق نے اس عزم کا اظہار کیا کہ وہ اپنے ساتھیوں کے ساتھ مل کر تعلیمی معیار کو مزید بہتر بنانے کے لیے بھرپور کوششیں کریں گی، تاکہ قصور میں ایک مؤثر اور جدید تعلیمی نظام کو فروغ دیا جا سکے۔
