قصور (باغی ٹی وی، ڈسٹرکٹ رپورٹر طارق نوید سندھو) قصور میں ڈکیتی کی سنگین واردات کے دوران ڈاکو نقدی، موبائل فون لوٹ کر ایک خاتون کو بھی اغوا کرکے لے گئے، جبکہ ضلع کے مختلف علاقوں میں چوری کی متعدد وارداتوں میں لاکھوں روپے مالیت کا سامان غائب کردیا گیا۔
تفصیلات کے مطابق تھانہ الہ آباد کے علاقے بونگی کلیاں کے قریب خواتین کو لے کر واپس جانے والے میرکوٹ چونیاں کے رہائشی محسن خالد ولد خالد مسیح کے کیری ڈبہ کو کرولا کار سوار ڈاکوؤں نے گن پوائنٹ پر روک لیا۔ ڈاکو 60 ہزار روپے نقدی، موبائل فون چھین کر خاتون انمول بی بی کو بھی اغوا کرکے ساتھ لے گئے۔
تلونڈی اڈا الہ آباد میں نامعلوم چور محمد نواب ولد رانا کے گھر سے 50 ہزار روپے نقدی اور قیمتی کاغذات چرا کر فرار ہوگئے۔
پولیس تھانہ بی ڈویژن کے علاقے لطیف پورہ میں چور محمد رمضان ولد جلال دین کے کارخانے کی دیوار پھلانگ کر 45 ہزار روپے مالیت کا سامان، جن میں 15 ایٹم سول جل، چھت والا پنکھا، جوکی مشین کی موٹر، بجلی کی وائرنگ اور سولر بلب شامل ہیں، لے اڑے۔
پتوکی سبزی منڈی کے قریب نامعلوم چور محمد شفقت ولد محمد اکرم کی موٹرسائیکل لے گئے جبکہ کوٹ سلیم حیدر سے بھی محمد آصف ولد محمد منشا کی موٹرسائیکل چوری کرلی گئی۔
پولیس تمام واقعات کی تفتیش کر رہی ہے اور ملزمان کی تلاش جاری ہے۔
