علی پور(باغی ٹی وی، نامہ نگار )علی پور تا خیرپور سادات روڈ کو فوری طور پر ڈبل کیا جائے، شہریوں اور سماجی حلقوں کا مطالبہ زور پکڑ گیا۔ تقریباً 12 کلومیٹر طویل یہ سڑک عرصہ دراز سے تنگ اور خستہ حالی کا شکار ہے، جسے مقامی افراد "سیکنڈ قاتل روڈ” کے نام سے پکارنے لگے ہیں۔ حادثات معمول بن چکے ہیں اور آئے روز قیمتی جانیں ضائع ہو رہی ہیں۔
اس مصروف شاہراہ پر دن رات بھاری اور ہلکی ٹریفک رواں دواں رہتی ہے، جس کے اطراف میں متعدد علاقے اور بستیاں واقع ہیں جن میں گبر اراہیں، سلطان پور، ارالہ، نبی پور، کندائی، شاہی والہ، خانگڑھ ڈومہ سمیت دیگر قصبات شامل ہیں۔ شہریوں کا کہنا ہے کہ سڑک کی تنگی کے باعث سفر نہ صرف خطرناک بلکہ وقت طلب بھی بن چکا ہے۔
عوامی و سماجی حلقوں نے وزیراعلیٰ پنجاب مریم نواز شریف سے اپیل کی ہے کہ علی پور تا خیرپور سادات روڈ کو دو رویہ (ڈبل) کیا جائے تاکہ حادثات میں کمی آئے، سفری سہولت بہتر ہو اور علاقائی ترقی کے دروازے کھل سکیں۔
