آیو دھیا میں 25 سالہ ہوٹل ملازم کو جمعہ کی صبح ایک خاتون کو نہاتے ہوئے فلمانے کے الزام میں گرفتار کر لیا گیا۔ پولیس کے مطابق یہ واقعہ رام مندر کے قریب واقع ایک گیسٹ ہاؤس میں پیش آیا۔
پولیس نے ملزم کے موبائل فون کی تفتیش کی تو اس میں دیگر خواتین کے نہاتے ہوئے کئی قابل اعتراض ویڈیوز بھی برآمد ہوئیں۔ حکام کے مطابق ملزم کی شناخت سوربھ تیواری کے طور پر ہوئی ہے، جو بہرائچ ضلع کا رہائشی ہے۔ اسے رجا گیسٹ ہاؤس سے پکڑا گیا، جو رام مندر کے گیٹ نمبر 3 سے صرف 50 میٹر کے فاصلے پر واقع ہے۔پولیس کے مطابق یہ واقعہ صبح تقریباً 6 بجے پیش آیا، جب وارانسی سے آئی ہوئی ایک خاتون بھکت نے چھت سے ایک سائے کو حرکت کرتے ہوئے دیکھا اور وہ محسوس کرنے لگی کہ کوئی اوپر سے اسے نہاتے ہوئے فلمارہا ہے۔ اس خاتون نے چیخ ماری اور نہانے کے کمرے سے باہر دوڑ گئی۔
"اس نے خوف کے عالم میں مدد کے لیے آواز دی اور باتھروم سے باہر نکل آئی،” پولیس افسر نے کہا۔ ہوٹل میں موجود دوسرے مرد مہمانوں نے اس کی آواز سنی، فوراً موقع پر پہنچے اور ملزم کو پکڑ لیا۔ بعد ازاں، ملزم کو رام جنم بھومی پولیس کے حوالے کر دیا گیا۔ملزم کے فون کی تفتیش کے دوران پولیس نے کہا کہ ان کو "کئی ویڈیوز” ملیں جو دیگر خواتین کے نہاتے ہوئے بنائی گئی تھیں۔شکایت کنندہ نے بتایا کہ وہ وارانسی سے اپنے چار ساتھیوں کے ساتھ رام مندر کی زیارت کے لیے آئی تھی اور گیسٹ ہاؤس میں رات گزارنے کے لیے دو کمرے بک کیے تھے۔آیو دھیہ کے سرکل آفیسر اشوتوش تیواری نے گرفتاری کی تصدیق کی۔
"یہ بہت سنجیدہ معاملہ ہے۔ جیسے ہی اطلاع ملی، ملزم کو گرفتار کر لیا گیا۔ مقدمہ درج کیا گیا ہے اور تفصیلی تحقیقات جاری ہیں،” انہوں نے کہا۔ ساتھ ہی انہوں نے بتایا کہ ہوٹل کی عمارت کی بھی تفصیلی تفتیش کی جا رہی ہے۔
دوسری جانب، آیو دھیہ ڈیولپمنٹ اتھارٹی (اے ڈی اے) نے گیسٹ ہاؤس کو غیر قانونی تعمیرات کی وجہ سے سیل کر دیا۔ اے ڈی اے کے سکریٹری ستندر سنگھ نے کہا، "راجا گیسٹ ہاؤس بغیر کسی اجازت کے تعمیر کیا گیا تھا اور اس وجہ سے سیل کر دیا گیا ہے۔” پولیس کا کہنا ہے کہ تحقیقات جاری ہیں تاکہ یہ معلوم کیا جا سکے کہ آیا اس قسم کے مزید واقعات اسی گیسٹ ہاؤس میں ہوئے ہیں یا نہیں اور آیا ان ویڈیوز کو کسی اور کو شیئر کیا گیا تھا یا نہیں۔
