خاتون نے شادی سے انکار پر تاجر کو گولی مارکر قتل کردیا

خاتون نے شادی سے انکار پر تاجر کو گولی مارکر قتل کردیا۔
باغی ٹی وی کی رپورٹ کے مطابق ضلع سوات کے علاقہ بریکوٹ کے مینابازار میں خاتون نے شادی سے انکار پر دن دہاڑے کپڑے کے تاجر کو گولی مارکر قتل کردیا۔

ایس ایچ او تھانہ غالیگے اختر ایوب کے مطابق بریکوٹ کے مینا بازار میں ملزمہ 30 سالہ نیلم نے کپڑے کی دکان میں گھس کر 32 سالہ تاجر حسین علی ولد محمد حسین کو گولی مار کر قتل کردیا۔

ملزمہ واردات کے بعد فرار ہورہی تھی کہ راستے میں ڈیوٹی پر موجود پولیس اہلکاروں نے اسے گرفتار کرکے پستول برآمد کرلیا۔ پولیس کے مطابق ملزمہ اور مقتول کے درمیان گزشتہ کئی سالوں سے تعلقات تھے۔ ملزمہ کے مطابق مقتول نے اس کے ساتھ شادی کا وعدہ کیا تھا اور بعد میں اپنی بات سے مکر گیا۔

پولیس کے مطابق ملزمہ طلاق یافتہ ہے جبکہ مقتول شادی شدہ اور چار بچوں کا باپ تھا۔تھانہ غالیگے پولیس نے خاتون کے خلاف قتل کا مقدمہ درج کرکے تفتیش شروع کردی ہے.