اوچ شریف :خواجہ نثار علی صدیقی آئندہ بلدیاتی انتخابات میں چیئرمین میونسپل کمیٹی کاالیکشن لڑیں گے

اوچ شریف ،باغی ٹی وی( نامہ نگار حبیب خان) ممتاز صنعت کار و سماجی شخصیت خواجہ نثار علی صدیقی نے آئندہ بلدیاتی انتخابات میں اپنا پینل تشکیل دینے اور چیئرمین میونسپل کمیٹی کے عہدے پر انتخاب لڑنے کی خواہش ظاہر کرتے ہوئے کہا ہے کہ پڑھی لکھی اور نوجوان قیادت ہی شہر کے دیرینہ مسائل حل کر سکتی ہے۔

میڈیا سے خصوصی گفتگو کرتے ہوئے انہوں نے کہا ہے کہ شہر کی تعمیر و ترقی اور فلاحی کاموں کے حوالے سے عوام ہماری بے لوث خدمات سے اچھی طرح واقف ہے۔ سابقہ ادوار میں عوام کی نمائندگی کرنے والے شہر کے مسائل پر قابو نہیں پا سکے، انہوں نے کہا کہ ڈیرے داری کی سیاست کا وقت اب گزر چکا ہے، اہل اور اہل دل قیادت سامنے لا کر شہریوں کے مسائل ان کی دہلیز پر حل کریں گے.

خواجہ نثار علی صدیقی نے مزید کہا کہ صحت کے شعبے میں ہماری خدمات کسی سے ڈھکی چھپی نہیں ہیں، القائم ٹرسٹ ہسپتال اوچ شریف اور گردونواح کے ہزاروں لوگوں کو علاج معالجے کی نہایت سستی اور معیاری سہولیات فراہم کر رہا ہے، اس پراجیکٹ کو مزید وسعت دی جائے گی،

ملک کی معاشی صورتحال پر تبادلہ خیال کرتے ہوئے خواجہ نثار علی صدیقی نے کہا کہ پاکستان کی معاشی صورت حال بہتری کی جانب گامزن ہے، وزیراعظم میاں محمد شہباز شریف نے جو اصلاحات کا سلسلہ شروع کیا تھا اس کے ثمرات آنا شروع ہو گئے ہیں مہنگائی میں واضح کمی آ چکی ہے

جب کہ سرمایہ کاری بھی آ رہی ہے، انہوں نے کہا کہ پاکستان کی سالمیت سے بڑھ کر کچھ نہیں، آپریشن عزم استحکام نہ صرف ملک میں امن و امان کے لیے ضروری ہے بلکہ یہ معاشی ضرورت بھی ہے۔