گوجرانوالہ:محرم الحرام،چیئرمین کابینہ کمیٹی برائے لاء اینڈ آرڈر خواجہ سلمان رفیق کی زیرصدارت اجلاس

گوجرانوالہ، باغی ٹی وی (نامہنگار محمد رمضان نوشاہی )محرم الحرام میں امن و امان کے قیام کے سلسلہ میں صوبائی وزیر صحت و چیئرمین کابینہ کمیٹی برائے لاء اینڈ آرڈر خواجہ سلمان رفیق کی صدارت میں کمشنر آفس گوجرانوالہ میں اہم اجلاس منعقد ہوا جس میں صوبائی وزراء مجتبٰی شجاع الرحمن، عاشق حسین کرمانی، بلال اکبر خان، سیکرٹری داخلہ نور الامین مینگل، آئی جی پنجاب ڈاکٹر عثمان انور کے علاوہ کمشنر گوجرانوالہ نوید حیدر شیرازی، آر پی او طیب حفیظ چیمہ ،ڈی سی گوجرانوالہ محمد طارق قریشی،ڈوثرن کے دیگر اضلاع کے ڈپٹی کمشنرز،سی پی او ،ڈی پی اوزاور گوجرانولہ ڈویژن سے ممبران اسمبلی ایم این ایز محمود بشیر ورک ،شاہد عثمان ابراہیم ،ایم پی ایز عمران خالد بٹ ،عمر فاروق ڈاڑ،محمد نواز چوہان اور متعلقہ اداروں کے افسران نے خصوصی طور پر اجلاس میں شرکت کی۔

اجلاس سے خطاب کرتے ہوئے صوبائی وزیر صحت خواجہ سلمان رفیق نے کہا کہ محرم الحرام میں فول پروف سیکورٹی اور امن وامان حکومت پنجاب کی اولین ترجیح ہے‘امن وامان میں رخنہ ڈالنے والوں سے آہنی ہاتھوں سے نمٹا جائیگا۔

انہوں نے کہا کہ پنجاب میں امن وامان کی صورتحال تسلی بخش ہے‘ ضلعی انتظامیہ، پولیس اور جلوس و مجالس کے منتظمین آپس میں باہمی اتفاق سے معاملات دیکھ رہے ہیں جو خوش آئند امر ہے۔

تمام ڈوثرنل ہیڈ کوارٹرز پر ایک وزیر کو زمہ داریاں سونپی گئی ہیں وہ پارلیمنٹرینز اور انتظامیہ کے ساتھ رابطے میں رہیں اور امن امان کے قیام کے لیے درکار اقدامات بروئے کار لائیں۔ صوبائی وزیر ٹرانسپورٹ بلال اکبر کو گوجرانوالہ ڈوثرن کی زمہ داریاں سونپی گئی ہیں۔اس موقع پرکمشنر نوید حیدر شیرازی اور آر پی او طیب حفیظ چیمہ نے سیکورٹی انتظامات پر بریفنگ دیتے ہوئے بتایا کہ گوجرانوالہ ڈویژن میں محرم الحرام کی 6858 مجالس اور 1588 جلوس کیلئے انتظامات مکمل ہیں۔

کابینہ کمیٹی نے امن کمیٹی اور منتظمین سے ملاقات کی اور مسائل بارے دریافت کیا۔خواجہ سلمان رفیق نے کہا کہ پنجاب کے 5 ڈویژنل ہیڈکوارٹرز میں خود جا کر انتظامات کا جائزہ لیا جن سے مطمئن ہیں۔