محکمہ تعلیم سندھ نے اسکول اساتذہ کے لیے نیا ضابطہ اخلاق تیار کیا ہے جس میں اساتذہ کے پیشہ ورانہ کردار اور اخلاقی رویوں کے بارے میں تفصیلات فراہم کی گئی ہیں۔ یہ ضابطہ اخلاق اسٹیک ہولڈرز کی مشاورت سے تیار کیا گیا ہے تاکہ تعلیمی اداروں میں ایک مثبت اور پیشہ ورانہ ماحول قائم کیا جا سکے۔
ضابطہ اخلاق میں اس بات پر زور دیا گیا ہے کہ اساتذہ ایسا لباس پہنیں جو پیشہ ورانہ اقدار اور ثقافتی احترام کی عکاسی کرے۔ خواتین اساتذہ کو مشورہ دیا گیا ہے کہ وہ زیادہ میک اپ سے اجتناب کریں، ہائی ہیلز پہن کر اسکول آنے سے گریز کریں اور زیادہ زیورات نہ پہنیں۔ اس کے بجائے روایتی لباس کا انتخاب کریں تاکہ اسکول کا ماحول رسمی اور ادب کے مطابق رہے۔ مرد اساتذہ کو بھی ٹی شرٹ اور جینز پہن کر اسکول آنے سے گریز کرنے کی ہدایت کی گئی ہے تاکہ وہ اسکول کے ماحول کے مطابق زیادہ مناسب لباس پہنیں۔
محکمہ تعلیم نے اس بات کی وضاحت کی ہے کہ اساتذہ اسکول کے احاطے میں گٹکا، نسوار، ماوا، سگریٹ یا اس قسم کی دیگر مضر صحت اشیاء کا استعمال نہیں کر سکتے۔ یہ ضابطہ اخلاق اس بات کو یقینی بنانے کے لیے تیار کیا گیا ہے کہ اسکول ایک صحت مند اور مثبت ماحول ہو۔اساتذہ کو یہ بھی کہا گیا ہے کہ وہ اپنے طلبا سے ذاتی کام نہ کروائیں اور جسمانی سزا سے بھی اجتناب کریں۔ اساتذہ کو اسکول انتظامیہ، تدریسی عملے اور غیر تدریسی عملے کے ساتھ احترام کے ساتھ بات کرنے کی ہدایت کی گئی ہے اور پیشہ ورانہ لہجے کو برقرار رکھنے کی درخواست کی گئی ہے۔اساتذہ کو مشورہ دیا گیا ہے کہ وہ اپنے طلبا کے ساتھ پیشہ ورانہ حدود میں رہتے ہوئے سلوک کریں اور پسند و ناپسند کی بنیاد پر کسی بھی قسم کے امتیازی سلوک سے گریز کریں۔ تمام طلبا کے ساتھ یکساں اور مساوی برتاؤ کو یقینی بنایا جائے گا۔
یہ ضابطہ اخلاق سندھ کے تعلیمی اداروں میں بہتر انتظام، نظم و ضبط اور پیشہ ورانہ رویوں کو فروغ دینے کی کوشش کا حصہ ہے۔ محکمہ تعلیم سندھ نے اس ضابطہ اخلاق کو نافذ کرنے کا فیصلہ کیا ہے تاکہ اسکولوں میں ایک مثبت اور تعلیمی ماحول قائم کیا جا سکے۔
