خودکشی کرنیوالے ایس ایس پی ابرار حسین نیکو کارہ کی نماز جنازہ ادا

خودکشی کرنیوالے ایس ایس پی ابرار حسین نیکو کارہ کی نماز جنازہ ادا

باغی ٹی وی کی رپورٹ کے مطابق ایس ایس پی ابرار حسین نیکوکارہ پرنسپل پولیس ٹریننگ سکول روات کی نماز جنازہ مکمل اعزاز کے ساتھ پولیس لائنز ہیڈکوارٹرز میں ادا کر دی گئی،نماز جنازہ میں آر پی او، سی پی او، ایس ایس پی آپریشنز، ایس ایس پی انویسٹی گیشن، سئینر پولیس افسران سمیت ملازمان کی کثیر تعداد میں شرکت کی،

راولپنڈی پولیس کے چاق وچوبند دستے نے سلامی پیش کی، ایس ایس پی ابرار حسین نیکوکارہ کے جسد خاکی کو مکمل اعزاز کے ساتھ تدفین کے لئے آبائی علاقہ کے لئے روانہ کر دیا گیا،

پولیس ٹریننگ اسکول روات کے پرنسپل میاں ابرار حسین نیکوکارہ نے مبینہ طورپر خود کشی کی ہے،ذرائع کے مطابق ایس ایس پی ابرار حسین ڈپریشن کا شکار اور ماہر نفسیات کے زیر علاج تھے۔

پولیس کے مطابق ایس ایس پی ابرارحسین نیکوکارہ نے پیرکی شام سوا 6 بجے کے قریب پی ٹی ایس روات میں اپنے کمرے میں خود کو گولی مار کرخودکشی کرلی۔وہ پولیس ٹریننگ اسکول کے احاطہ میں واقع سرکاری رہائشگاہ میں بیوی اور دو بچوں کے ہمراہ رہائش پذیر تھے۔

سی پی او راولپنڈی کے مطابق بظاہر خودکشی فائر آرم کے ذریعہ کی گئی ہے ،خود کشی کا نوٹ بھی جاۓ وقوعہ سے ملا ہے تاہم پوسٹ مارٹم کے بعد مزید تفصیلات سامنے آ سکیں گی۔

میاں ابرار حسین نیکوکارہ چنیوٹ کے نواحی علاقہ ہرسہ شیخاں کے رہنے والے تھے ،انہوں نے 18 جنوری 2019 کو پی ٹی ایس روات کے پرنسپل کا چارج لیا اور تقریباً ایک سال سے وہ اس عہدے پر خدمات سرانجام دے رہے تھے۔