ضلع خیبر: شہید پولیس اہلکار ثاقب خان کی نماز جنازہ سرکاری اعزاز کے ساتھ ادا

ضلع خیبر(باغی ٹی وی رپورٹ) تھانہ ملاگوری حملے میں شہید پولیس اہلکار کی نماز جنازہ سرکاری اعزاز کے ساتھ ادا کی گئی،تھانہ ملاگوری حملے میں شہید ہونے والے پولیس اہلکار ثاقب خان کی نماز جنازہ خیبر پولیس لائنز شاکس میں پورے سرکاری اعزاز کے ساتھ ادا کی گئی۔

نماز جنازہ میں ڈی پی او رائے مظہر اقبال، ایس پی انویسٹیگیشن روح الامین، اے سی جمرود عامر زیب سمیت شہید کے لواحقین، پولیس افسران، اہلکاروں اور بڑی تعداد میں اہل علاقہ نے شرکت کی۔ اس موقع پر پولیس افسران نے شہید کے تابوت پر پھول چڑھائے اور ان کی مغفرت اور بلند درجات کے لیے دعا کی۔

ڈی پی او رائے مظہر اقبال نے شہید کے اہل خانہ سے تعزیت کرتے ہوئے ان کی خدمات پر خراج تحسین پیش کیا۔ انہوں نے کہا کہ ثاقب خان ایک بہادر اور خوش اخلاق افسر تھا اور ان کے خون کو رائیگاں نہیں جانے دیا جائے گا۔ پولیس نے عزم ظاہر کیا کہ شہداء کی قربانیوں کو ہمیشہ یاد رکھا جائے گا اور امن کے قیام کے لیے ان کا مشن جاری رکھا جائے گا۔