لنڈی کوتل (باغی ٹی وی)خیبر انسٹیٹیوٹ آف ٹیکنیکل ایجوکیشن (KITE) لنڈی کوتل کے لیے ایک قابلِ فخر لمحہ اُس وقت آیا جب موٹر سائیکل مکینک کورس کے تین ہونہار طلبا محمد آصف، حضرت عمر اور بلال خان کو پاکستان کی مشہور کمپنی HONDA پاکستان لمیٹڈ میں منتخب کر لیا گیا۔ یہ کامیابی نہ صرف KITE بلکہ پورے لنڈی کوتل کے لیے ایک بڑا اعزاز تصور کی جا رہی ہے۔
طلبا کی سلیکشن پر کمانڈنٹ خیبر رائفلز بریگیڈیئر عاصم عزیز کیانی، آفیسر انچارج/پرنسپل واجد علی خان (CSP)، ایڈمن میجر دانیال الطاف گوندل اور ادارے کے تمام اسٹاف نے خوشی کا اظہار کرتے ہوئے خصوصی مبارکباد پیش کی۔
منتحب ہونے والے طلبا نے اپنی کامیابی کا سہرا KITE کی بہترین تربیت، محنتی انتظامیہ، اور اعلیٰ تدریسی معیار کو دیا اور کہا کہ یہ ادارہ لنڈی کوتل کی نوجوان نسل کے لیے ایک گیم چینجر کی حیثیت رکھتا ہے۔ انہوں نے دیگر نوجوانوں کو بھی KITE سے فائدہ اٹھانے کی ترغیب دیتے ہوئے کہا کہ یہ ادارہ علاقے میں معاشی ترقی، ہنر مندی، اور روزگار کے نئے مواقع پیدا کر رہا ہے۔
KITE کی اس کامیابی کو علاقائی سطح پر ایک بڑی پیش رفت اور ہنر کی بنیاد پر ترقی کی علامت قرار دیا جا رہا ہے، جو فاٹا انضمام کے بعد سرحدی علاقوں میں تعلیم و تربیت کی نئی راہیں ہموار کر رہا ہے۔
