ڈاکٹرغلام مصطفی بڈانی
کوئی کرے نہ کرے، ضمیر تو کرے گا
تحریر: میاں محسن اقبال ایڈووکیٹ ہائی کورٹ
فلسطین کی زمین لہو سے تر ہے، غزہ کی گلیاں معصوم لاشوں سے بھری پڑی ہیں،
ننھے وجود خاک تلے دبے ہیں،
اور انسانیت، غیرت، ایمان… سب ماتم کناں ہیں۔
یہ کیسا دور ہے کہ بچوں کے چیتھڑے اُڑ جائیں، ماں کی گود اجڑ جائے، باپ کی لاش مسجد کے دروازے پر پڑی ہو اور امتِ محمدیہ خاموش تماشائی بنی بیٹھی ہو۔
یہ 57 اسلامی ممالک کس مرض کی دوا ہیں؟
جن کی فوجیں کروڑوں میں ہیں،
جن کے پاس جدید اسلحہ، ایٹمی طاقتیں اور وسائل کے انبار ہیں… مگر ایک معصوم فلسطینی بچے کے لیے ان کی بندوق نہیں چلتی!
ان کے جنگی طیارے صرف یومِ جمہوریہ کی پریڈ کے لیے ہیں؟
کیا ان کی توپوں کا رُخ صرف اپنے عوام کی طرف ہوتا ہے؟
کیا ان کا ضمیر صرف تب جاگتا ہے جب اقتدار کو خطرہ لاحق ہو؟
اور اسلامی دنیا کے سپہ سالارو!
کس نیند میں ہو تم؟ کس دشمن کے انتظار میں ہو جو تمہیں جگائے؟
یا تمہاری تلواریں صرف عزت کے نازک پردوں پر چلنے کے لیے بنی ہیں؟
تمہاری خاموشی… تمہارا بزدل سکوت…
یہ صرف امت کی نہیں، محمدِ عربیؐ کے دین کی توہین ہے۔
اور مدارس کے علما!
جنہوں نے منبر و محراب کو سنبھالا،
جن کی زبانوں میں فصاحت تھی،
جن کی تقریروں سے لوگ روتے تھے،
آج وہ کہاں ہیں؟
کیوں ان کے خطبوں میں غزہ کا ذکر نہیں؟
کیوں منبر سے وہ چیخ سنائی نہیں دیتی جو باطل کے ایوانوں کو ہلا دے؟
کیا ان کے ایمان کی حرارت ختم ہو چکی ہے؟
کیا آج دین کے محافظ صرف خاموشی کے پیکر بن چکے ہیں؟
یہ وہ ننھا فلسطینی کر رہا ہے جس کا آدھا جسم بمباری میں ختم ہو چکا ہے،
وہ ماں کر رہی ہے جو اپنے بیٹے کی کٹی ہوئی ٹانگیں اُٹھا کر دوپٹے میں لپیٹ رہی ہے،
وہ باپ کر رہا ہے جس نے اپنے چار بچوں کو کفن کے بغیر دفن کیا۔
امتِ مسلمہ!
یاد رکھو!
تمہاری بندوقیں خاموش رہیں، تمہارے علما خاموش رہے، تمہارے بادشاہ، صدر، وزیرِاعظم، جنرل… سب چپ رہے، تو کوئی کرے نہ کرے… ضمیر تو کرے گا!
سوال کرے گا… پکارے گا… اور تمہاری بے حسی کو بے نقاب کرے گا۔
