ڈاکٹرغلام مصطفی بڈانی
کوٹ ادو(باغی ٹی وی )خفیہ گودام پر چھاپہ، 8000 تھیلے چینی برآمد، گودام سیل
کوٹ ادو میں اسسٹنٹ کمشنر اصغر لغاری اور خفیہ اداروں کی مشترکہ کارروائی میں چینی کی ذخیرہ اندوزی بے نقاب ہو گئی۔ سنانواں میں واقع ایک گودام پر چھاپہ مار کر 8000 تھیلے چینی برآمد کر لی گئی اور گودام کو سیل کر دیا گیا۔ حکام کے مطابق ذخیرہ اندوزی میں ملوث افراد کے خلاف قانونی کارروائی کا آغاز کر دیا گیا ہے۔
حکومت کی واضح ہدایات کے باوجود مصنوعی مہنگائی پیدا کرنے کے لیے چینی کی ذخیرہ اندوزی کی جا رہی تھی۔ خفیہ اطلاع پر اسسٹنٹ کمشنر کوٹ ادو نے ٹیم کے ہمراہ سنانواں میں قائم ایک خفیہ گودام پر چھاپہ مارا، جہاں ہزاروں گٹو چینی غیر قانونی طور پر ذخیرہ کیے گئے تھے۔ موقع پر موجود گودام عملے سے پوچھ گچھ کی گئی، جبکہ ذخیرہ شدہ چینی کو ضبط کر کے سرکاری تحویل میں لے لیا گیا۔
اس موقع پر اسسٹنٹ کمشنر اصغر لغاری کا کہنا تھا کہ کسی کو بھی عوام کے حق پر ڈاکا ڈالنے کی اجازت نہیں دی جائے گی۔ ان کے مطابق یہ کارروائی حکومت کی ہدایات کے مطابق عمل میں لائی گئی تاکہ چینی کی قیمتوں کو قابو میں رکھا جا سکے اور عوام کو ریلیف دیا جا سکے۔
انتظامیہ نے اعلان کیا ہے کہ برآمد شدہ چینی کو سرکاری نرخوں پر مارکیٹ میں فراہم کیا جائے گا تاکہ مصنوعی قلت اور قیمتوں میں اضافے کو روکا جا سکے۔ دوسری جانب، ذخیرہ اندوزوں کے خلاف مزید تحقیقات جاری ہیں اور ملوث عناصر کو قانون کے مطابق سزا دی جائے گی۔
