پشاور: پاکستان تحریک انصاف (پی ٹی آئی) کے بانی عمران خان نے خیبر پختونخوا کابینہ کے اراکین کی کارکردگی کا جائزہ لینے کے لیے احتساب کمیٹی کو ایک رپورٹ پیش کرنے کی ہدایت کی ہے۔ ذرائع کے مطابق،عمران خان نے کمیٹی کو مئی تک رپورٹ پیش کرنے کی ہدایت کی ہے۔ اس رپورٹ میں وزراء کی کارکردگی اور فنڈز کے استعمال سے متعلق تفصیل فراہم کرنے کی توقع کی جا رہی ہے۔
احتساب کمیٹی کے ذرائع کا کہنا ہے کہ کمیٹی نے کابینہ اراکین کو طلب کرنا شروع کر دیا ہے تاکہ وہ اپنی کارکردگی اور فنڈز کے استعمال کے بارے میں تفصیلات فراہم کریں۔ رپورٹ کے مطابق، خیبر پختونخوا کے 4 صوبائی وزراء کی کارکردگی غیر تسلی بخش پائی گئی ہے، اور اس رپورٹ کو بانی پی ٹی آئی کو پیش کیا جائے گا۔پی ٹی آئی کی احتساب کمیٹی کے رکن قاضی انور ایڈووکیٹ نے جیو نیوز سے گفتگو کرتے ہوئے بتایا کہ کمیٹی کو مئی کے پہلے ہفتے میں کابینہ اراکین کی کارکردگی کی رپورٹ پیش کرنے کا حکم ملا ہے۔ ان کا کہنا تھا کہ تمام وزراء، مشیر اور معاونین کمیٹی کے سامنے اپنی رپورٹس پیش کریں گے، اور کابینہ اراکین فنڈز اور ان کے استعمال سے متعلق کمیٹی کو معلومات فراہم کریں گے۔
قاضی انور ایڈووکیٹ نے مزید کہا کہ اس عمل کو مئی میں مکمل کر کے رپورٹ بانی پی ٹی آئی عمران خان کو پیش کر دی جائے گی۔ اس سے قبل وزیرِ خوراک نے کمیٹی کو اپنی کارکردگی رپورٹ پیش کی تھی، اور اب دیگر وزراء کی رپورٹس کا انتظار ہے۔
